உலக அழிவு-01

2012 இல் உலகம் அழியுமாமே?

மணி ஸ்ரீகாந்தன்

2012 டிசம்பர் 21ம் திகதி உலகம் அழிந்துவிடுமாம்! இப்படி ஒரு செய்தியையும் இது பெரும் நாகரிகமான மாயன் நாகரிகத்தைச் சேர்ந்த மாயர்கள் பயன்படுத்திய கலண்டரை அடிப்படையாகக் கொண்டது என்ற ஆதாரத்துடனும் உலக ஊடகங்கள் பரபரப்பான தகவல்களை வெளியிட்டு வருகின்றன. உலகம் 2000ஆம் ஆண்டு பிறக்கும் போதும் கூட உலகம் அழியப் போகிறது என்ற பீதி கிளம்பியது. சரி, இது பற்றி நம்மவர்கள் என்ன சொல்கிறார்கள் என்று நம் நாட்டிலும், தமிழகத்திலும் சில பிரபலங்களிடமும் சாமானியர்களிடமும் கேட்டோம்.

கார்டூனிஸ்டும், எழுத்தாளரும் அறிஞருமான மதனிடம் பேசினோம்.

சூரியன் அழியும் போதுதான்...

"மாயன் கலண்டர் என்பது ஒரு நாகரிகத்தை பிரதிபலிக்கிறது. அது ஒரு காலக்கட்டத்தின் அடையாளம். அந்தக் காலக்கட்டத்தில் வரையப்பட்டதுதான் மாயன் கலண்டர். அந்த காலக்கட்டத்தில் வானிலை அறிவு இல்லாவிட்டாலும் சில விசயங்கள் நிரூபிக்கப்பட்டுள்ளன. ஆனால் அவர்கள் குறிப்பிட்ட 2012 என்பது வேறு. அதையும் இதையும் இணைத்து குழப்பிக்கொள்ளக் கூடாது. மாயர்கள் ஒன்றை மட்டும் சரியாக கணித்திருக்கிறார்கள். அது உலகம் அழியும் என்ற அந்த ஒரு விசயம் மட்டும்தான். 400 கோடி ஆண்டுகளுக்கு முன்பாக உருவான இந்த பூமியின் அழிவு இன்னும் பல கோடி வருடங்களுக்குப் பிறகுதான் நிகழும்.

மதன்

இப்போதைக்கு அழிவு கிடையாது அதனால் எதையும் நினைத்து பயப்படத் தேவையில்லை. சூரியனால் உயிர்வாழும் இந்த பூமிக்கு இன்னும் ஆயுள் இருக்கிறது. சூரியன் தனது ஹைட்ரஜன் எரிவாயுவை இது வரை பாதியைத்தான் செலவழித்து இருக்கிறது. இன்னும் பாதி அப்படியே இருக்கிறது. அது முடிவடைய இன்னும் பல கோடி வருடங்கள் ஆகும். பூமியின் ஹைட்ரஜன் வாயு எரிந்து குறையக் குறைய சூரியனின் அளவு இன்னும் பல மடங்காக பெரிதாகும். அப்போது உருவாகும் வெப்பம் பூமியை அழிக்கும். ஆனால் வெப்பம்    அதிகரிக்கும் போது மனிதன் நிலத்திற்கடியில் பாதாளத்தில் நகரங்களை அமைத்து வாழ வழி செய்துக் கொள்வான். ஆனால் இவற்றையெல்லாம் நீங்களும் நானும் பார்க்கப் போவதில்லை.... சீனா, பாபிலோன், ரோம, இந்து நாகரிங்கள் உச்சத்தில் இருந்தபோது பிரளயம் ஏற்பட்டதாக நிறைய கதைகள் உள்ளன. இந்து நாகரிகத்தில் கூட கலிகாலம் முடிவதைப் பற்றிய குறிப்பு இருக்கிறது", என்றார் மதன்.

உலகம் முற்றாக அழியாது

வேலூரில் அமைந்திருக்கும் உலகின் மிகப் பெரிய தங்கக் கோவிலை நிறுவியரான சக்தி அம்மாவுடன் தொடர்பு கொண்டு இது பற்றிக் கேட்டோம்.

சக்திஅம்மா.

"மாயன் கலண்டரில் கூறப்பட்டது போல பேரழிவு ஏற்பட்டு பூமி அழியும் என்பதெல்லாம் வெறும் மாயை. ஆனால் நமது இந்து சாஸ்த்திரப்படி இந்தக் கலிகாலத்தில் ஆங்காங்கே சில அழிவுகள் ஏற்படும். ஆனால் அது பேரழிவாக இருக்காது, பூமிக்கு இன்னும் ஆயுள் இருக்கிறது. கிரக சஞ்சாரத்தின்படி பார்த்தாலும் அழிவு என்பது இப்போதைக்கு இல்லை, ஆனால் ஆண்டவன் என்ன நினைக்கிறானோ தெரியவில்லை" என்கிறார் சக்திஅம்மா.

இதை இயேசுவின் வருகையோடு தொடர்புபடுத்த வேண்டாம்

அவரைத் தொடர்ந்து மன்னார் தமிழ் நேசன் அடிகளார் கருத்து என்ன சொல்கிறார் என்று பார்ப்போம்.

"சிலர் உலக அழிவு என்பது ஏசுவின் இரண்டாம் வருகையோடு தொடங்கி விடும் என்கிறார்கள். அது முற்றிலும் தவறான செய்தி. ஏசுவின் வருகை எப்போது என்பது நமக்குத் தெரியாது. ஆனால் அது என்றோ நடக்கத்தான் போகிறது. எனினும் உலக அழிவு இப்போதைக்கு இல்லை. ஊடகங்கள் வியாபார நோக்கத்திற்காகவும் பரப்பரப்பு செய்திக்காகவும் 2012ல் உலகம் அழியும் என்று கூறி வருகின்றன. ஏற்கனவே 2000ஆம் ஆண்டில் உலகம் அழியப் போவதாக செய்தி பரவியதை அடுத்து சிலர் தற்கொலை செய்து கொண்டதாகவம் நாம் கேள்விப்பட்டிருக்கிறோம். எனவே மக்கள் இந்தச் செய்தியை நம்பக் கூடாது. உங்களைப் படைத்த கடவுள் உங்களை காப்பார்" என்றார் தமிழ்நேசன் அடிகளார்.

உலகமா... இப்போதா... ஹா...ஹா...ஹா...

அவரைத் தொடர்ந்து தமிழகம் முழுவதும் பட்டிமன்றங்களை நடத்திவிட்டு மதுரையில் தமது வீட்டில் கொஞ்சம் ஓய்வாக இருக்கலாமே என்று நிம்மதி பெருமூச்சு விட்டபடி சாய்வு நாற்காலியில் அமர்ந்திருந்த பட்டிமன்றம் புகழ் சொலமன் பாப்பையாவிடம் எங்கள் கேள்வியைத் தொடுத்தோம். "ஹே... ஹே... ஹா... ஹா..." என்ற சொலமனுக்கு உரித்தான அந்தச் சிரிப்பு பதிலாக வந்து விழுந்தது.

பாப்பையா

"நம்ம ராஜா, பாரதிபாஸ்கர் இவங்களையெல்லாம் சமாளிச்சு பதில் சொல்லிட்டு கொஞ்சம் நிம்மதியாக உட்காரலாம் என்று பார்த்தா விடமாட்டீங்களேய்யா... எல்லோரும் சந்தோசமா இருக்கிறது உங்களுக்கு பிடிக்கல்லியோ? இப்படி குண்டத் தூக்கி போடுறீங்களே... எல்லாம் நடக்க வேண்டிய நேரத்தில நடக்கும்யா..." என்று கல கல கலவென்று பாப்பையா சிரிப்பதைக் கேட்டதுமே உலகத்திற்கு இன்னும் ஆயுள் கெட்டி என்பதை உணர்ந்து கொண்டோம்.

சொலமன் பாப்பையாவைத் தொடர்ந்து சென்னை கோடம்பாக்கம் பக்கமாக ஒரு நடை போட்டோம். அங்கே ரங்கராஜபுரத்தில் தமது அலுவலகத்தில் பிஸியாக இருந்த விஜய்டி.வி ‘நீயா நானா’ புகழ் கோபிநாத்தை சந்தித்து நாம் வந்த விடயத்தைச் சொன்னோம். அவரும் தமக்கே உரிய ஸ்டைலில் சிரித்து விட்டு பேசினார்.

உலகச் சூழலை பாதுகாக்காவிட்டால்.....

"அறுபதுகளில் கூட ஒரு வால் நட்சத்திரம் பூமியில் விழுந்து அழியப் போவதாக கூறப்பட்டது, அதேப் போல 90களில் ஒரு விண் கல் பூமியை நோக்கி வருவதாகச் சொல்லப்பட்டது. பிறகு இரண்டாயிரம், இப்போ 2012 இன்னும் பத்து வருடம் கழித்து இன்னொன்றைச் சொல்வார்கள். இதனால் மனிதனுக்கு தனது ஒட்டுமொத்த அழிவு குறித்த பயமும் சுவாரஸ்யமும் எப்;போதும் இருந்து கொண்டே இருக்கும். இதற்கு ஊடகங்களின் அதிகரிப்பும் ஒரு முக்கிய காரணம்தான். மாயன் கலண்டர் இரண்டு வகைப்படும். ஒன்று குறுகிய காலத்தையும், மற்றது நீண்ட காலத்தையும் குறிக்கிறது. அதாவது இரண்டு சுற்றுகள். இதன்படி 2012 டிசம்பர் 21 வரை மட்டுமே அதில் குறிப்பிடப்பட்டுள்ளது.

கோபிநாத்

 அதன் மற்றது நம் கையில் இல்லை என்பதற்காக உலகம் அழிந்து விடப்போவதாக நாம் நினைத்துக் கொள்வது தவறு. விஞ்ஞானிகள் கூட இப்போது உலகம் பிரச்சினைகளை நோக்கி போய் கொண்டிருப்பதாக சில விசயங்களை சொன்னார்கள் அதில் ஒன்று சூரியப்புயல். அந்த சூரியப் புயலின் பிரச்சினைகள் சமீபகாலமாக மேற்கு உலகில் தொடங்கிவிட்டது. மேலும் ஓசோன் படலத்தில் ஓட்டை விழுந்திருக்கிறது. இவ்வாறான சூழல் பாதிப்புகள் இருக்கத்தான் செய்கின்றன. நாம் இப்போது 2012ல் உலகம் அழியுமா என்பதைப் பற்றி யோசிக்கத் தேவையில்லை. ஆனால் சூழலைப் பற்றிக் கவலை படாமல் நாம இப்படியே இயற்கையை பிடுங்கிப் பிடுங்கி தின்றுக் கொண்டிருந்தால் உலகம் ஒரு நாள் மனிதன் வாழத் தகுதியற்றதாக மாறிவிடத்தான் போகிறது. பெற்றோர் பிள்ளைகளுக்கு சேர்த்து வைப்பது பணம் மட்டும் கிடையாது. நாளைக்கு அவர்கள் சுவாசிக்க சுத்தமான காற்று, வாழ்வதற்கு சுத்தமான பூமி, விஷமாகாத உணவு என்பனவற்றையும் அவர்களுக்கு நாம் விட்டுச் செல்ல வேண்டும். உலக நாடுகள் இதை சிந்திக்காமல் இயற்கையை பேராசையோடு தொடர்ந்தும் சுரண்டித் தின்றால் உயிரினங்கள் அழிந்து போவதைத் தடுக்க முடியாது.

இங்கே இன்னொன்றையும் நாம் கவனிக்க வேண்டும். இயற்கையானது எவற்றினால் அழிவுகள் ஏற்படும் என்று கருதுகிறதோ அவற்றைத் தடுப்பதற்கான மாற்று ஏற்பாடுகளையும் செய்து வைத்திருக்கிறது. கடலோரத்தில் அமைந்திருக்கும் சதுப்புநிலக் காடுகளை நீங்கள் அவதானித்து இருப்பீர்கள், அது கடலரிப்பைத் தடுக்கிறது, சுனாமி போன்ற பாதிப்புகள் வரும்போது இச்சதுப்பு நிலக்காடுகள் சேதத்தைக் குறைக்கின்றன. ஆனால் இந்த இயற்கை அரண்களை மனிதன் அழிக்கிறான். பூங்காக்களையும் நகரங்களையும் அமைத்து அழகு பார்க்கிறான். உலகம் அழிவது கூட இன்று மனிதனுக்கு சுவையான ஒரு விஷயமாகி விட்டது. சச்சின் செஞ்சரி அடிப்பாரா என்று வேடிக்கை பார்ப்பது போல எதிர்பார்த்துக் கொண்டிருக்கிறார்கள். எதிர்வரும் டிசம்பரில் உலகம் அழியும் என்றால் இன்னும் கொஞ்ச நாட்கள் தான் பாக்கி ஆனால் வெளியே சென்று பார்த்தால் யாருமே டென்ஷனாக இல்லை. எல்லோரும் ஜொலியாகத் தான் இருக்கிறார்கள். அதனால் நீங்கள் பயப்படத் தேவையில்லை" என்று கோபிநாத் தைரியமூட்டி முடித்தார்.

அடுத்ததாக நாம் களுத்துறை மாவட்ட ஹல்வத்துரை மகாவித்தியாலய ஆசிரியரான பிரதாபனை சந்தித்தோம்.

சூழல் மாசடைவது பற்றி யோசிப்போம்

"உலகத்திற்கு ஒரு அழிவு வரும்னா அது சூரியனால்தான் வரும். நான் ரொம்ப சின்னவனாக இருந்த போது எங்க ஊர் ஆற்றில் கரணம் போட்டு குதித்து குளிப்போம். ஆனால் இன்றைக்கு அந்த ஆற்றில் முழங்கால் அளவுக்கூட தண்ணீரில்ல, படிப்படியாக தண்ணீர் குறைந்து கொண்டே வருவதை நம்மால் பார்க்க முடிகிறது.

பிரதாபன்

அது முற்றிலும் தீர்ந்து போனால், நினைக்கவே பயமாக இருக்கிறது. ஆனால் உலகம் 2012ல் அழியும் என்பதை மாயன் கலண்டரை வைத்துக் கொண்டு கூற முடியாது. மாயன் எழுதிய கலண்டரின் மற்ற பாகம் எங்காவது இருக்கலாம் அல்லது அழிந்து போயிருக்கலாம். முதலில் அதை கண்டுபிடிக்கணும்" என்கிறார் பிரதாபன் ஆசிரியர்.

இவரை சந்தித்து விட்டு வரும் போது வழியில் இங்கிரிய றைகம் குறிஞ்சி மகாமாரி அம்மன் ஆலய தலைவர் கிருஸ்ணனை சந்தித்தோம்.

ருத்ர தாண்டவம் நடக்கும்.

"உலகத்தில் அதர்மம் அழிந்து விட்டது. பெற்றோர் சொல்வதை பிள்ளைகள் கேட்காத காலம் இது. கடவுளும் எவ்வளவு காலத்துக்கு தான் பொறுத்துக் கொள்வார்? அதனால் ஒரு ருத்ர தாண்டவம் சீக்கிரமே நடக்கத்தான் போகுது. அது எப்போன்னு சொல்ல முடியாது. அந்த அழிவின் போது லட்சக்கணக்கில் மக்கள் இறப்பார்கள்.

கிருஸ்ணன்

இந்த அழிவு எங்காவது ஒரு பக்கத்தில் நடக்கும். இதெல்லாம் மனுஷன திருத்த கடவுள் ஆடும் திருவிளையாடல். என்னடா கடவுளின் ஆட்டத்திற்கு லட்சக்கணக்கிலா உயிர் பழியாகணும் என்று கேட்கிறீர்களா? பத்துப்பேர் செத்தா அது விபத்து, லட்சக்கணக்கில செத்தா அது அழிவு" என்றார் அவர்.

பாவங்கள் கற்களாக சுற்றுகிறதாம்

அப்போது அங்கோ குறுக்கிட்ட தோட்டத் தொழிலாளியான எஸ்.திரவியராஜா, இதெல்லாம் நம்ம படைச்ச சிவனோட வேலைதானுங்க என்றார். சிவபுராணத்தில சொல்லியிருப்பதைப் போல 'ஆக்குவார், காப்பார், அழிப்பார், அருள்தருவார்'. அதுதான் இப்போ நடக்கப்போகுது. ஆனால் எப்போன்னு சொல்ல முடியாது. நம்ம செய்த பாவங்கள் எல்லாம் வானத்தில் கற்களாக சுத்திக்கிட்டு இருக்காம். அது தலையில விழுந்து முன்னோர் காலத்திலும் உலகம் அழிந்ததாகவும் சொல்லப்படுது. அப்படியும் நடக்கலாம். என்றார் திரவியராஜா.

கொழும்பு செட்டியார் தெருவில் ஆருடம் பார்க்கும் மதுரையை சேர்ந்த எம். மாணிக்கத்திடமும் கேட்டுப் பார்த்தோம்.

உலகம் ஷேமமாக இருக்கும்.

"இது கர வருடம். இதுமுடிய நந்தன வருஷம் பிறக்கிறது. அது பூமியின் ஆரோக்கியமான வளர்ச்சியையே காட்டுகிறது. மற்றப்படி கிரகங்களில் எந்த ஆபத்தையும் காணமுடியவில்லை. நந்தன என்பதில் 'ந' என்பது அனுஷ நட்சத்திரத்தையே குறிக்கிறது. இரண்டாவதாக சனியின் ஆதிக்கமும் இருக்கிறது, சனி சுக்கிரன் வீட்டில் 2012லிருந்து இரண்டரை ஆண்டுகள் எந்த. ஆபத்தும் இல்லாமல் வாழ்வார். அப்போ எப்படி உலகம் அழியும்?" என்று ஒரு போடு போட்டார் அவர்!

மாணிக்கம்.

உலக அழிவு-02

பேரழிவுகளுடன் கண்ணாமூச்சி ஆடும் உலகம்

மணி ஸ்ரீகாந்தன்

உலகம் என்ற இந்தக் கிரகம் சூரிய குடும்பத்தில் உருவாகி ஐநூறு கோடி வருடங்கள் கடந்துவிட்டன. தன் இயக்கத்தை நிறுத்தாமல் சுற்றிச் சுழலும் உலகம் இன்னும் 500 வருடங்கள் இப்படியே சுழன்று கொண்டிருக்கும். அதன் பின்னர் தன் சக்தியை இழக்க ஆரம்பிக்கும் சூரியன், அணையப் போகும் சுடரைப்போல தன் பிரகாசத்தையும் வெப்பத்தையும் பல நூறு மடங்காக அதிகரிக்கும். அவ்வாறு சூரியன் பிரமாண்ட உருவெடுக்கும் போது அதைச் சுற்றிச் சுழலும் பெரும்பாலான கோள்கள் கருகிச் சாம்பலாகிவிடும். நமது உலகமும் பஸ்பமாகி விடும். இது விஞ்ஞானிகளின் கணிப்பு. ஆனால் மாயன் சமூகத்தினரால் வடிவமைக்கப்பட்ட கலண்டரின் படி. இவ் வருடம் டிசம்பர் மாதம் 21ம் திகதி காலை 11 மணி 11 நிமிடத்தோடு உலகம் முடிவுக்கு வந்து விடுமாம். மாயன் நாட்காட்டியில் இந்தத் திகதிக்குப் பின்னர் எந்தத் தகவலும் இல்லை@ நாட்காட்டி முடிவுக்கு வந்து விடுகிறது என்பதால்தான், உலகம் அன்றைய திகதியின் பின்னர் அழிந்து விடும் என்று பரவலான நம்பிக்கை நிலவுகிறது. தூபம் போடுவது போல ஊடகங்கள் கிளப்பி வரும் பரபரப்பான செய்திகளும் இந்த பரபரப்புக்கு ஒரு காரணம் தான்.

உலகம் தோன்றிய ஐநூறு கோடி ஆண்டு காலத்தில் இந்த உலகம் அழிந்து விடும் என்ற ஊகங்கள் பல தடவைகள் வெளியிடப்பட்டுள்ளன. அந்த நம்பிக்கையின் தொடர்ச்சியாகத்தான் இந்த மாயன் கலண்டர் விவகாரத்தைப் பார்க்க வேண்டியிருக்கிறது. விண்ணில் இருந்து வந்த பேராபத்துகளில் இருந்து உலகம் பல தடவைகள் தப்பிப் பிழைத்துள்ளது. அப்படியான ஒரு பேராபத்து ஒன்றின் போது உலகை ஆட்சி செய்து வந்த டைனோசர்கள் முற்றாக அழிந்து ஒழிந்தன என்பதை விஞ்ஞானிகள் கண்டுபிடித்து விஞ்ஞான உலகமும் அதை ஏற்றுக் கொண்டுள்ளது. இன்னொரு புறம், கடற்கோள்கள், பூகம்பங்கள், எரிமலை போன்ற இயற்கை சீற்றங்களும் உலகில் பெரும் அழிவுகளை ஏற்படுத்தியுள்ளன. இந்த அழிவுகள் இன்றைக்கும் நிகழ்ந்து கொண்டிருக்கின்றன. லெமூரியா கண்டம் கடற்கோளினால் அழிந்ததாக சொல்லப்படுகிறது. பூம்புகாரை கடல் கொண்டிருக்கிறது. கண்டங்கள் நகர்ந்திருக்கின்றன. உலக மேற்பரப்பு அமைப்பில் இவ்வாறு உள்ளக மற்றும் வெளிப்புற காரணங்களினால் பெரும் மாறுதல்கள், அழிவுகள், மூலம் ஏற்பட்டிருக்கிறது.

எனினும் அந்தக் காலத்தில் தொலைத் தொடர்பு சாதனங்களும், ஊடகங்களும் இல்லாததால் உலகின் ஒரு பக்கத்தில் என்ன நடக்கிறது என்பது மறுபுறத்தில் இருப்போருக்கு தெரியாதிருந்தது. எனவே பரபரப்பும் மிகைப்படுத்தலும் அக்கால மக்கள் மத்தியில் காணப்படவில்லை. 1912ம் ஆண்டு டைட்டானிக் மூழ்கியபோது அதை உலக மக்கள் அறிந்து கொள்ள பல நாட்கள் பிடித்தன. பல வருடங்களுக்கு முன்னால் இமய மலை சிகரமொன்றில் இருந்து ஒரு சுறா மீனின் பாறைப்பதிவை கண்டுபிடித்தார்கள். பனிமலைச் சிகரத்தில் கடல்வாழ் உயிரினம் வந்தது எப்படி என ஆராய்ந்த போதுதான் இமயமலை பிரதேசம் கோடிக்கணக்கான வருடங்களுக்கு முன்னர் கடலுக்கடியில் இருந்ததாகவும் தொடர்ச்சியான பாரிய பூகம்பங்களின் காரணமாக உலகின் ஒரு பகுதி பிதுங்க, தாழ்வான பகுதி உயர்ந்து இமய மலையானது என்ற உண்மை வெளியானது.

உலக அழிவு-03

பூமியைத் தொடர்ந்து வரும் பேரழிவுப் பீதி!

kzp =fhe;jd;

உலக அழிவை நோக்கி நாம் பயணித்துக் கொண்டிருக்கிறோம். என்ற பயம் ஒரு சிலருக்கு இருந்தாலும், எப்போ அழியும். எப்படி அழியும் என்பதை வேடிக்கை பார்க்கவும் சிலர் தயாராகத் தான் இருக்கிறார்கள். இந்த உலகம் இதுவரை காலமும் பல அழிவுகளை சந்தித்திருக்கிறது. உலகப் பந்து எதிர் கொண்ட சவால்களை பார்த்தால் உங்களுக்கு வியப்பாகத்தான் இருக்கும்.

1994ம் ஆண்டு ஜீலை 16ம் திகதி சூமேக்கர் லெவி என்ற வால்வெள்ளி வியாழ கிரகத்தின் மீது துண்டு துண்டாக உடைந்து வீழ்ந்ததை நாம் மறக்க முடியாது. சூரியக் குடும்பத்திலேயே பெரிய கிரகம், ஜூபிட்டர் என அழைக்கப்படும் வியாழன். சூமேக்கர் லெவி நட்சத்திரத்தின் துண்டுகள் வியாழனை ஒன்றும் செய்யாது என்பது தெரிந்திருந்தாலும், அது அதிரும், குலுங்கும், சில ரசாயனங்களை விண்ணில் பீய்ச்சியடிக்கும் என சிலர் எதிர்வு கூறியதோடு அது பூமியை வந்தடைந்து சூழல் பாதிப்புகளை ஏற்படுத்தலாம் என்றும் அச்சம் தெரிவித்தனர். ஆனால் ஒன்றுமே நடக்கவில்லை. ஒரு முழு சொக்கலட்டையும் முழுங்கிவிட்டு வாயைத்துடைக்கும் குண்டுப் பையனைப் போல அத்தனை தாக்குதல்களையும் உள்வாங்கிக் கொண்டு கம்மென்றிருந்து விட்டது வியாழன்!

உலகம் முடிவுக்கு வந்துவிடப் போகிறது என்ற அச்சம் இன்று நேற்று ஏற்பட்ட ஒன்றல்ல. உலகம் அழியப் போகிறது என்ற இந்த நம்பிக்கை நீண்ட நெடுங்காலமாக இருந்து வரும் ஒன்றாகும். இந்த நம்பிக்கை கிறிஸ்தவ நாடுகளில் தான் அதிகம். ஏனெனில் உலக முடிவு கோட்பாடுகள் பெரும்பாலும் கிறிஸ்தவத்தை அடிப்படையாக கொண்டதாக உள்ளதே இதற்கு காரணம். விவிலியத்தின் புதிய ஏற்பாட்டில் உலக அழிவு பற்றி விரிவாக சொல்லப்பட்டுள்ளது. உலக அழிவுக்கான காரணங்கள், யேசுவின் இரண்டாம் வருகை. உலக முடிவின் ஆரம்பம், மாண்;டவர்கள் மீண்டும் உயிர்த்தெழுதல் நியாய தீர்ப்பு என்று இறுதிநாள் பற்றி பைபிள் விரிவாகச் சொல்கிறது. இந்த உலக அழிவு கோட்பாடு, ஐரோப்பியர்களின் வருகையின் பின்னரேயே ஆசிய நாடுகளில் வேர்பிடிக்க ஆரம்பித்தது. உலக முடிவு குறித்து தமிழ் இலக்கியங்களில் விரிவான குறிப்புகள் கிடையாது. ஊழித்தாண்டவம், ஊழிக் காலம் பற்றி கூறப்படுகின்றபோதும் உலக அழிவுடன் அவை தொடர்புபட்டதாக இல்லை.

1910ம் ஆண்டில் ஹெலீஸ் வால் வெள்ளி நமது பூமிக் அருகில் பயணம் செய்தது. இது, கடந்த நூற்றாண்டின் மிகப்பெரும் ஆச்சரியங்களில் ஒன்று. இந்த வால் வெள்ளி 75 ஆண்டுகளுக்கு ஒரு தடவையே சூரியனை நோக்கி வரும் அப்படி 1910இல் வந்தபோது ஹெலீஸ் சின் நீண்ட வால் பகலிலும் கண்ணுக்கு தெரிந்ததாம்! அதே ஆண்டில் மே 10ம் திகதி நமது பூமி ஹெலீஸ் வாலின் நுனிப்பகுதியின் ஊடாக எந்த வித பிரச்சினையும் இன்றி கடந்து சென்றது. அன்றைய தினம் உலகம் எரிந்து சாம்பலாகி விடும் என்றும் பூமி இரண்டாகப் பிளந்து விடும் என்றும் உலகெங்கும் எதிர்வுகள் கூறப்பட்டன. பலர் பயந்து தற்கொலை செய்து கொண்டனர். முழு நாளையும் பிரார்த்தனை செய்யும்படி மதகுருமார் மக்களை வேண்டிக் கொண்டனர். உலக மக்கள் நடு நடுங்கியிருக்க பூமி பத்திரமாக வாயைக் கடந்து சென்றது. உலகமே பெருமூச்சு விட்டது. தான் ஒன்றும் பப்படம் அல்ல என்பதை மற்றொரு முறை நிரூபித்தது.

பின்னர் நாற்பதுகளின் இறுதியிலும் நம் நாட்டிலும் வேறு சில நாடுகளிலும் பூரண சூரிய கிரகணம் ஏற்பட்டபோதும் உலகம் முடிந்து விடப் போகின்றதோ என்ற ஒரு தேவையில்லா பீதி நாடு முழுவதும் பரவியதாம்.

பூமியின் மீது இதுவரையில் 120 பாரிய விண்பாறைத் தாக்குதல்கள் நடைபெற்றிருப்பதாக கண்டுபிடிக்கப்பட்டுள்ளது. இவை அனைத்தும் மனித இனம் மண்ணில் தோன்றிராத காலத்துக்கு முன்னதாக பல லட்சம் வருடங்களுக்கு முன்னால் தான் நடந்திருக்கிறது. அரிசோனா மாநிலத்தில் பெரிய பள்ளம் ஒன்று காணப்படுகிறது. இது சுமார் ஐம்பாதாயிரம் வருடங்களுக்கு முன்னர் ஏற்பட்டதாக அறியப்பட்டுள்ளது. இது பெரிஞ்சர் விண்கல் பள்ளம் என்று அழைக்கப்படுகிறது. இதன் இன்றைய ஆழம் 550 அடி. குறுக்களவு மூவாயிரத்து 900 அடி.  இரும்பு தாதுக்கள் நிறைந்த ஒரு விண்பாறையின் தாக்குதலே இப் பள்ளாத்தாக்குக்கு காரணம் என்கிறார்கள் விஞ்ஞானிகள்.

இதே போல் ஜெர்மனியின் நூர்லிஜின் நகருக்கு அன்மையில் 625 சுற்றளவில் ஒரு பள்ளம் காணப்படுகிறது. இது சுமார் ஒரு கோடியே ஐம்பது லட்சம் ஆண்டுகளுக்கு முன்னர் ஏற்பட்ட விண்பாறைத் தாக்குதலில் ஏற்பட்டதாக கூறுகிறார்கள். இதே போல் 1968ம் ஆண்டு இக்ராஸ் என்ற பெயர் கொண்ட ஒரு பாறை 40 லட்சம் மைல் தொலைவில் பூமியை கடந்து சென்றது. இந்த விண் பாறையின் குறுக்களவு ஒரு கிலோ மீட்டர். இது பூமியின் மீது மோதியிருந்தால் பேரழிவு ஏற்பட்டிருக்கும்.

1989ம் ஆண்டு அரைமைல் அகல விண்பாறை ஒன்று பூமி பயணம் செய்த பாதையைக் கடந்து சென்றது. அந்த விண்பாறை பயணம் செய்த பாதையில்தான் பூமியும் ஆறு மணித்தியாலத்துக்கு முன்பாக பயணம் செய்திருந்தது. இந்த சந்தர்ப்பத்தில் இரண்டும் நேருக்கு நேர் சந்தித்திருந்தால் அழிவு பயங்கரமாக இருந்திருக்கும். அப்போதும் நாம் தப்பி விட்டோம். இப்போது சூரிய புயல், மாயன் கலண்டர் இவையும் கிலியை ஏற்படுத்துபவை தான். 2012இல் உலகம் அழிந்து விடும் என்று பிரச்சாரம் செய்து வரும் ஊடகங்களும், உலக அழிவை நம்பும் சில மத வாதிகளும் இந்த பீதியை மக்களிடையே கொண்டு சேர்ப்பதில் வெற்றிப் பெற்றிருக்கிறார்கள். ஆனால் அன்றைய நாட்களில் இப்படியான கதைகளை கேட்டு நம்பி வாழ்க்கையை வெறுத்து தற்கொலை செய்து கொண்டவர்களை போல் இன்று யாரும் தற்கொலை செய்துக் கொள்ள தயாரில்லை. உலகம் அழியுதா....? சரி அது பாட்டுக்கு அழியட்டும் என்று தங்கள் வேலையை பார்த்துக் கொண்டிருக்கிறார்கள். இது ஆரோக்கியமான விசயம் தானே.........

(தொடரும்)

சிறப்புற்று விளங்கிய மாயன் நாகரிகம்

மீசோ-அமெரிக்க நாகரிகம் என்று மாயன் நாகரிகம் அழைக்கப்படுகிறது. சீன, எகிப்திய, சிந்துவெளி நாகரிகங்களைப் போல சிறப்புப் பெற்ற நாகரீகமே மாயன் நாகரிகம். மத்திய அமெரிக்காவின், ஹொன்டூராஸ், மெக்ஸிகோ, கௌதமாலா, வட எல்சல்வடோர் ஆகிய நாடுகளின் நிலப்பரப்பில் சுமார் 625 மைல் விஸ்தீரனத்தில் இம்மாயர்கள் வாழ்ந்து வந்தனர். இன்று சுமார் ஆறு லட்சம் மாயர்கள் மெக்ஸிகோ, கௌதமாலா பகுதிகளில் பெரும்பாலும் வறியநிலையில் வாழ்ந்து வருகிறார்கள் என்பது இவர்களில் பலருக்குத் தெரியாது என்பது வேதனையான உண்மை.

கி.மு 2600 களில் மாயன் நாகரீகம் தோன்றியிருக்க வேண்டும். இவர்கள் எழுத்துமொழியைப் பயன்படுத்தினார்கள். கணிதம், வானியல், கட்டடக்கலை, நகர நிர்மாணம், நீர்முகாமைத்துவம், வடிகால் முறை என்பனவற்றில் சிறந்து விளங்கினார்கள். சூரியனை ஆதி தெய்வமாகக் கருதி வழிபட்டார்கள், எகிப்தியர்களைப் போலவே. இவர்கள் சூரிய குடும்பம் சஞ்சரிக்கும் பால்வெளியை அறிந்திருந்தார்கள் என்றும் ஓரியன் நெபுலா என்றழைக்கப்படும் ~தூசு மேகம் பற்றியும் அறிந்திருந்தார்கள் என்றும் மாயன் நாகரிகத்தை ஆய்வு செய்த டாக்டர் ரிச்சர்ட்சன் என்ற ஆய்வாளர் குறிப்பிடுகிறார்.

மாயர்களின் நாகரிகம் கி.பி. 250-900 காலப்பகுதியில் உச்சத்தில் இருந்தது. மாயன் பொருளாதாரம் வணிகம் மற்றும் விவசாய பொருள் உற்பத்தியை அடிப்படையாகக் கொண்டிருந்தது. தாமிர மணிகள், கொக்கோ விதைகள், கடல் சங்குகள், சோளம், அவரை அல்லது பட்டாணி, வெனிலா போன்றவை பயிரிடப்பட்டன.

மாயன் மக்கள் உச்சத்தில் இருந்த போது அவர்களை பிற்காலத்தில் வெற்றி கொண்டு அந்த இனத்தையே துவம்சம் செய்த ஐரோப்பியர் இருண்ட யுகத்தில் வாழ்ந்து கொண்டிருந்தனர் என்பது குறிப்பிடத்தக்கது. கட்டடங்களுக்கு செங்கற்கள் பயன்படுத்தப்பட்டன. இவை ஒரே அளவைக் கொண்டிருந்தன. அடுக்கு முறையில் சுவர்கள் எழுப்பப்பட்டன. மெக்ஸிகோ நகரின் சியாபாஸ் என்ற இடத்தில் வீடுகள், மாளிகைகள், கோவில்கள் என ஆறாயிரம் சிதிலங்கள் ஆய்வாளர்களினால் கண்டுபிடிக்கப்பட்டுள்ளது. இர்க் பிரெஞ்ச் என்ற ஆய்வாளர் இவற்றைக் கண்டறிந்ததோடு இவை கி.பி. 100-800 காலப்பகுதியைச் சேர்ந்தது எனக் குறிப்பிட்டுள்ளார்.

பெரிய துளை பின்னர் சிறிய துளை என்று ஏற்படுத்துவதன் மூலம் வடிகாலில் கொண்டு செல்லும் நீருக்கு பீய்ச்சியடிக்கும் அல்லது உயரமான இடத்துக்கு எடுத்துச் செல்லக்கூடிய அழுத்தத்தை ஏற்படுத்தலாம் என்பதை மாயர்கள் அறிந்து வைத்திருந்தனர். 216 அடி நீள வாய்க்கால், 20 அடி உயர நீர்வீழ்ச்சி, 150 மீட்டர் நீளத்துக்கு நீரைக் கடத்தியது போன்ற சாதனைப் பட்டியல் மாயர்களுடையது.

உலக அழிவு-04

உலகம் அழியும் ஆனால் அழியாது…

மணி ஸ்ரீகாந்தன்

பூமியில் அநியாயம் அதிகரித்து விட்டது> அதனால்தான் கடவுளின் அக்னிப் பார்வை பூமியின் மீது விழுந்து விட்டது. என்றும் விரைவிலேயே கடவுள் நியாந்தீர்க்க வருவார் என்றும் ஏராளமானோர் நம்பிக் கொண்டிருக்கிறார்கள். அந்த நம்பிக்கையின் உச்சமாகத்தான் நம்மவர்கள் 2012இல் உலகம் அழியலாம் என்று கருதுகிறார்கள். சில மதங்களின் சில மத கோட்பாடுகளின் காரணமாகத்தான் இந்த உலக அழிவு அச்சம் பரவத் தொடங்கியிருக்கிறது. உலக அழிவை காரணம் காட்டியே சிலர் மத மாற்றத்தையும் வளர்த்திருக்கிறார்கள். மத மாற்றத்திற்கான பெரிய ஆயுதமாக இந்த உலக அழிவு அல்லது மனிதகுல அழிவு இருந்து வருகிறது. உலக அழிவுகள் பற்றி பல தடவைகள் ஆருடம் கூறப்பட்ட போதும் இதுவரை இவ்வுலகத்துக்கு எந்தப் பாதிப்பும் ஏற்பட்டதாகத் தெரியவில்லை. பூமி நலமாகத்தான் இருந்து வருகிறது.

விஞ்ஞானத்தின் அடிப்படையில் பார்ப்போமானால் உலகம் அழிவதாக இருந்தால் அது சூரியனால் தான் நிகழும் என்பது மறுக்க முடியாத உண்மை. அதற்கும் சூரியனில் பெரும் மாற்றங்கள் ஏற்பட வேண்டும். அந்தக் கொடிய திகதி வந்தடைவதற்கு நாம் இன்னும் 500 கோடி ஆண்டுகள் காத்துக் கிடக்க வேண்டும், நீங்கள் தயாரா?

சூரியனின் ஆயுளின்படி இப்போதுதான் 500 கோடி ஆண்டுகளை அது முடித்திருக்கிறது. இன்னும் 500 கோடி ஆண்டுகள் வரை அது உயிர் வாழும். ஆனால் இன்னும் இருபது கோடி ஆண்டுகளுக்குப் பிறகு சூரியனில் மாற்றம் ஏற்படத் தொடங்கி விடும் அதன்படி சூரியனின் சக்தி குறைய அது தடுமாற்றத்தை சந்திக்கும். இதன் காரணமாக சூரியனின் உற்பகுதி சுருங்க ஆரம்பிக்கும். அப்போது வெளிப்புறம் உப்பிப் பெரிதாக, வெப்பம் பன்மடங்காக அதிகரித்து தீக் குழம்புகள் சீறி எழும். சூரியனின் வெளிப்புறம் உப்பிப் பெரிதாகும் போது சூரியனின் அருகே அதைச் சுற்றிவரும் மேற்குறி மற்றும் வீனஸ் கிரகங்கள் பஸ்பமாகிவிடும். இக்காலப்பகுதியில் பூமியில் வெப்பம் பன்மடங்கு அதிகமாகி, அதன் தட்ப வெப்ப காலநிலை மாறிவிடும். இது நடைபெறுவதற்கு பல லட்சம் வருடங்களுக்கு முன்னரேயே ஜீவராசிகளும் தாவரங்களும் மடிந்து போயிருக்கும், மனிதர் உட்பட வெப்ப அதிகரிப்பு காரணமாக கடல் நீராவியாகிவிடும். அதன் மேற்பரப்பு சாம்பல் தரையாகிவிடும். இப்படி நடக்கப் போகும் சம்பத்தை நினைத்து நீங்கள் அச்சப்படத் தேவையில்லை ஏனென்றால் மனிதகுலம் மறைந்து பல ஆயிரம் ஆண்டுகள் கடந்து விட்டிருக்கும். அல்லது அண்டவெளியில் மிகவும் தொலைவிலுள்ள வேற்று கிரகத்தில் அமர்ந்து வேதனையுடன் பூமி அழிவதை மனிதர்கள் வேடிக்கை பார்த்துக் கொண்டிருக்கலாம். எப்படியோ, சூரியனில் ஏற்படக் கூடிய பெரும் மாற்றங்களே பூமிக்கு உலைவைக்கும் என்பது உறுதி.

நமது பூமியின் வயது 460 கோடி ஆண்டுகள். ஆனால் இந்த பூமியும், கிரகங்களும் கடவுளால் படைக்கப்பட்டவை என்ற கோட்பாட்டின் அடிப்படையில்தான் இந்த உலக அழிவுப் பற்றிப் பேசப்படுகிறது. உலகமும், அதில் வாழும் உயிரினங்களும் ஒரு சில தினங்களில் படைக்கப்பட்டவை அல்ல. கோடான கோடி வருடங்களுக்கு முன்னால் இயற்கையின் சுய பரிசோதனை முறைகளின் ஊடாகவே பூமியின் உயிரினங்கள் தோன்றின. ஆனால் இந்த விடயத்தை அனேகர் புரிந்துக் கொள்ள மறுக்கிறார்கள்.

உலகமும், உயிரும் படைக்கப்பட்டது. படைத்தவருக்கு எதிராக பாவங்களை நாம் செய்வதால் அது அவரை எரிச்சலடையச் செய்யும் என்றும் பிறகு அவரின் ஆத்திரம் நம்மை முற்றாக அழித்து விடும் என்றும் பரவலான ஒரு நம்பிக்கை காணப்படுகிறது. ஏற்கனவே பிரளயத்தின் மூலம் உலகம் அழிக்கப்பட்டதாகவும் எஞ்சிய உயிரினங்கள் மூலம் மீண்டும் உயிரினப் பெருக்கம் நடைபெற்றதாகவும் கூறப்படுகிறது. இக் கோட்பாட்டை முற்றிலும் மறுப்பதற்கில்லை. ஏனெனில் உலகம் பெரும் அழிவுகளை சந்தித்திருக்கிறது என்பதற்கு ஆதாரங்கள் உள்ளன. எனினும் உலக அழிவு எப்போது வேண்டுமானாலும் நிகழலாம் என்ற மத அடிப்படையிலான நம்பிக்கையே, 2012இல் அழிவு வரலாம் என்ற பீதியை மாயன் கலண்டர் வாயிலாக மீண்டும் புகுத்தப்படுகிறது.

பரிணாம வளர்ச்சியினால் தான் மனிதன் உலகில் தோன்றினான் என்பது ஏற்றுக் கொள்ளப்பட்ட உண்மை. மிருகங்களின் பல குணங்கள் நம்மிடையே அப்படியே காணப்படுகின்றன. ஆத்திரம், மூர்க்கம், இரத்தவெறி என்பன, சில சமயங்களில், மிருகங்களை விட மோசமாகவே நம்மிடம் உறைந்துள்ளன. உலகில் நிகழும் அல்லது அதிகரித்துச் செல்லும் வன்முறைகள், கொடூரங்கள், யுத்தங்களை எடுத்துக் கொண்டால் நாம் மிருக சாயல் கொண்டவர்களே தவிர தேவ சாயல் கொண்டவர்களாக இல்லை என்பது புலனாகும்.

நம்முடையதும் ஏனைய மிருகங்களினதும் அடிப்படையாக இருப்பது அடித்து பிடித்து வாழ வேண்டும் என்ற உந்துதல்தான். ஓட்டத்தில் எது திறமைசாலியோ, ஈடுகொடுக்கக் கூடியதோ அதுவே முந்தும், நீடித்து நிலைக்கும் என்பது டார்வின் தத்துவம். எல்லா உயிரினங்களும் உயிர் வாழ்வதற்காக போராடிக் கொண்டிருக்கின்றன. ஈடுகொடுக்க முடியாதவை மடிந்துவிட ஏனையவை களத்தில் நிற்கின்றன. மனிதனால் ஈடுகொடுக்க முடிவதால்தான், ஒரு காலத்தில் டைனோசர்களால் ஆளப்பட்ட இந்த உலகை இன்று மனிதனால் ஆள முடிகிறது. ஈடுகொடுக்க முடியாத எண்ணற்ற தாவரங்கள் மடிந்துவிட்டன. உயிரினங்களும் அப்படியே.

உலகில் ஒரு பேரழிவு நிகழ்ந்த போது டைனோசர்கள் மடிந்தன. அப்படி மடிந்திருக்காவிட்டால் பாலூட்டிகள் தோன்றியிருக்க முடியாது. என்பது உயிரியல் அறிஞர்களின் முடிவு. பாலூட்டிகளின் வளர்ச்சியை மனிதனை தோற்றம் பெறச் செய்தது. எனினும் இதே மனிதன் தனது நலன்களுக்காக இயற்கையின் மீது தற்போது தாக்குதல் தொடர்ந்திருக்கிறான். இது எல்லையில்லாமற் போனால் இயற்கை திருப்பித்தாக்கத் தொடங்கும். இது மனிதனை பேரழிவுக்கு இட்டுச் செல்லும்.

460 கோடி வயதை பூர்த்தி செய்துள்ள இந்த பூமியின் கடைசிக் காலத்தில் பாரிய பூகம்பங்களும் எரிமலைக் குமுறல்களும் நடக்கும் என்று சில மதங்கள் சொல்கின்றன.