வெளிநாட்டு குற்றச் செயல்களை விசாரிக்கும் இந்த நீதிமன்றத்துக்கு இன்று விசாரணைக்கு வந்திருப்பது அமெரிக்காவின் மிசிசிப்பி மாநிலத்தில் இடம்பெற்ற ஒரு கொலைச் சம்பவம்.
இன்று குற்றவாளிக் கூண்டில் ஏற்றப்பட்டிருப்பவரைத் தான் நீங்கள் இங்கே பார்க்கிறீர்கள்.
இவரது பெயர் ஜொஷீவா சலோவிச். இவரது வயது 25. பயிற்சிபெற்ற குத்துச்சண்டை வீரர்.
திருமணம் செய்துள்ள இவருக்கு 3 வயதுடைய ஒரு மகள் இருந்தாள். அவளது பெயர் பெய்லி சலோவிச். தனது மூன்று வயது மகளை கொலை செய்த குற்றத்தின் பேரில் இவர் கைதுசெய்யப்பட்டு இங்கு விசாரணை கூண்டில் நிறுத்தப்பட்டிருக்கிறார்.
தான் கேட்ட கேள்விகளுக்கு சரியான பதில்களை கூற முடியாத நிலையில் தனது மகள் இந்த உலகத்தில் எதிர்காலத்தில் உயிர்வாழ்வதற்கு பெரும் போராட்டத்தை எதிர்கொள்ள நேரிடும் என்று கருதியதாலேயே தனது மகளை கொலை செய்தாக ஜொஷிவா சலோவிச் பொலிஸாரிடம் காரணம் தெரிவித்திருக்கிறார். இந்த உலகத்தில் வாழ்வது என்பது மிகவும் கஷ்டமானது என்பதும் தாக்குப்பிடிக்க வேண்டுமானால் அவள் மிகவும் சிரமப்படவேண்டியிருக்கும் என்பதும் ஜொஷீவாவின் கருத்து
கணக்கு பாடத்தில் இது, போன்று வாரத்துக்கு ஐந்து தடவைகள் ஜொஷீவா தனது மகளிடம் கேள்வி கேட்பது வழக்கமாகும் சரியான பதில் கூறாவிட்டால் அவளை அடிப்பதும் வழக்கம். ஆனால் இம்முறை பெய்லியை பலமாக தாக்கியதால் பெய்லியின் உடம்பில் சிராய்ப்பு காயங்களும், வெட்டு காயங்களும் எற்பட்டன. தலையிலும் காயம் ஏற்பட்டது.
தாக்குதல் நடந்த போது பெய்லியின் தாய் வீட்டின் மற்றொரு அறையில் இருந்ததாக தெரியவருகிறது. ஆனால் தனது மகள் தாக்குதலுக்குள்ளாகியதையடுத்து பொலிஸாருக்கு போன் செய்து பெய்லியை அவரது தாயார்தான் வைத்தியசாலைக்கு கொண்டு செல்ல உதவியிருக்கிறார்.
இச்சம்பவத்தை படிக்கும் போது இங்கேயும் ஒரு தந்தை தன் மகன் ஐந்தாம் ஆண்டு புலமைப்பரிசில் பரீட்சையில் வெற்றி பெறவில்லை என்பதால் மகனுக்கு சூடு போட்ட சம்பவம் ஞாபகம் வரலாம்.நாம் எதற்கு எடுத்தாலும் தண்டனை கொடுக்கவே முயல்கிறோம். இது பரம்பரையாக வரும் ஒரு எண்ணம். ஏனெனில் தவறு செய்தால் கடவுள் தண்டிப்பார் என்றுதான் சிறு வயதிலேயே நமக்கு சொல்லித்தரப்படுகின்றது. எங்கும், எதற்கும் தண்டனையே வழங்கப்படுகிறது. எனவே தண்டிப்பதன் மூலமே திருத்த முடியும் என்பது நம்மில் பதிந்துவிட்ட ஒன்றாக இருக்கிறது. ஆனால் தண்டிப்பதன் மூலம் மட்டுமே எவரையும் திருத்த முடியாது என்பதே உண்மை.
