எம்.ஜி.ஆரின் அனிமேஷன் திரைப்படம் வெளிவருவதாக சொன்னீர்கள் இன்னும் காணோமே..?

ஆர்.சிவராம்- மாங்குளம்.

கிழக்கு ஆப்பிரிக்காவில் ராஜு என்ற திரைப்படம் தயாராகி வந்தது உண்மைதான், ஆனால் சில பணப் பிரச்சினைகள் காரணமாக அதன் தயாரிப்பு வேலைகள் தற்காலிகமாக நிறுத்தப்பட்டுள்ளது.
தற்போது எம்.ஜி.ஆரின் கனவு திரைப்படமான பொன்னியின் செல்வன், ‘வந்தியதேவன்’ என்ற பெயரில் அனிமேஷனில் தயாரிக்கப்பட்டுள்ளது.
அப்படத்தில் எம்.ஜி.ஆருக்கு ஜோடியாக ஜெயலலிதா நடித்துள்ளார்.
கல்கியின் பொன்னியின் செல்வன் கதையைத் திரைப்படமாக எடுக்கவேண்டும் என்பது எம்.ஜி.ஆரின் நீண்டநாள் கனவாக இருந்தது. போஸ்டர்வரை வந்து அந்தப் படம் கைவிடப்பட்டது.

சனீஷ்வர் அனிமேஷன்ஸ் என்ற நிறுவனம் இந்த படத்தை தயாரித்துள்ளது.
நான்கு ஆண்டுகளாக நடைபெற்ற பணி நிறைவடைந்துள்ள நிலையில் இத்திரைப்படத்தின் பாடல் ஒன்றை இக்குழு சமீபத்தில் வெளியிட்டுள்ளது. ‘பெரியார் குத்து’ பாடல் மூலம் அனைவரின் கவனத்தைக் கவர்ந்த ரமேஷ் தமிழ்மணி இப்பாடலுக்கு இசையமைத்துள்ளார்.
எம்.ஜி.ஆரின் தத்துவப் பாடல்கள் காலத்தை வென்றவை என்பதை நாம் அறிவோம். இத்திரைப்படத்தில், சந்தோஷ் ஜெயகரனின் குரலில், வந்தியத்தேவனின் அறிமுகப் பாடல் ‘உலகம் என் உலகம் நான் உத்தரவிட்டால் விடியும்’ என்று தொடங்கி ‘ஒவ்வொரு நொடியும் வைரம் என்றால் காலம் புதையல்தானே; ஒவ்வொரு உள்ளமும் அரியணை என்றால் நிரந்தர அரசன் நானே!’ என்று நிறைவடைகிறது.  இந்த படம் வெளியானால் எம்.ஜி.ஆர் ரசிகர்கள் நிச்சயம் சந்தோசப்படுவார்கள்.


இந்த வயசுல ரஜினிக்கு, தர்பார் தேவையா..?

கே. குணசேகரன்- இரத்தினபுரி.

இந்த கேள்வியை இன்றைய இளைய தலைமுறை நடிகர்கள்தான் கேட்க வேண்டும், ஏனென்னறால் ரொம்பவும் வயிறு எரிந்து கொண்டிருப்பவர்கள் அவர்கள்தான்.
70பது வயதில் வயதானவர் ஒரு மூலையில் உட்கார்ந்து, ஓய்வு எடுக்கணும், அல்லது முதியோர் இல்லத்தில் இருக்கணும் என்பதுதானே நம்மவர்களின் எண்ணமாக இருக்கிறது.
ஆனால் ரஜினி விடயத்தில் அது தலைகீழாகவே இருக்கிறது.
இன்றைய இளைய தலைமுறைகளை பின்னுக்குத் தள்ளி, ஆக்ஷன், காதல், நகைச்சுவை என்று பட்டையை கிளப்புறாரே…!
உண்மையை சொல்லணும்னா, ரஜினி ஒரு மேஜிக் மேன்தான். இந்த வயசுல இத்தினை ஆட்டமா என்று, நாம் ஆச்சரியப்பட்டு போகிறோம்.
தர்பார் படம் வெளியாகி 10 நாட்களில் இந்திய மதிப்பில் 200 கோடி வசூலை அள்ளியிருக்கிறது என்றால் சும்மாவா!, ரஜினி ஒரு பந்தயக் குதிரை இன்னும் சில காலத்துக்கு ஓடும்.
தமிழ் திரையுலகுக்கு ரஜினியின் அவசியமும், தேவையும் இருக்கிறது.


சமந்தாவுக்கு குழந்தை பிறந்து விட்டதா..?

கே. அர்ச்சனா- கொழும்பு-15

திருமணம் முடித்து இரண்டு ஆண்டுகளுக்கு மேல் ஆகிவிட்டது. இன்னும் எந்த அறிகுறியும் இல்லைன்னு அவரின் ரசிகர்கள் பலர் டுவிட்டரில் எழுதி வருகிறார்கள்.
ஆனால் இப்போதைக்கு குழந்தை இல்லை என்பதில் சமந்தாவும், நாகசைத்தன்யாவும் உறுதியாக இருக்கிறார்கள்.
‘குழந்தை பிறந்து விட்டால் நான் சினிமாவை விட்டு விலக வேண்டியிருக்கும். அதேவேளை நான் குழந்தையாக இருக்கும் போது, பல பிரச்சினைகளை சந்தித்து இருக்கிறேன். அப்படியொரு சூழல் என் குழந்தைக்கு வந்து விடக் கூடாது.
ஆனாலும், வருகின்ற 2022-ம் ஆண்டு, ஓகஸ்ட் 7ந் திகதி காலை 7 மணிக்கு எனக்கு குழந்தை பிறக்கும்’ என்று கிண்டலுடன் கூறியுள்ளார்.


நம்ம அன்னக்கிளி கோபிகா இப்போ என்ன செய்றாங்க..?

கே. சுகுமார்- அகலவத்தை.

ஆட்டோகிராஃப், எம் மகன் போன்ற படங்களில் நடித்த கோபிகாவிற்கு ரசிகர்கள் மத்தியில் நல்ல வரவேற்ப்பு இருந்தது. ஆனால் அவரின் திருமணத்துக்கு பிறகு ஆள் காணமல் போய்விட்டார்.
மலையாள நடிகையான இவர், கேரளா மாநிலத்தில் உள்ள திருச்சூரில் 1985ல் பிறந்த இவர் சிறுவயதில் இருந்து பரதநாட்டியம் பயின்று வந்தார். சமூகவியலில் பட்டம் பெற்றார். விமானப் பணிப்பெண்ணாக ஆக வேண்டும் என்ற ஆசை கொண்டவருக்கு 2002ம் சினிமா உலகில் வாய்ப்பு கிடைத்தது.
அதன் பிறகு முன்னணி நடிகையாக உச்சம் தொட காத்திருந்தவர் காதல் வலையில் வீழ்தார்.
ஜூலை 17 - 2008ல் அகிலேஷ் என்றவரை திருமணம் செய்து கொண்டார். இவர்களுக்கு தற்போது இரண்டு குழந்தைகள் உள்ளனர். கோபிகா தற்போது தனது கணவர் மற்றும் குழந்தைகளுடன் அவுஸ்திரேலியாவில் வசித்து வருகிறார்🔴

எனது கனவு நாயகி திரிஷா முன்னணி நடிகர்கள் எல்லோருடனும் ஜோடி சேர்ந்து விட்டாரா?

ஆர். கார்த்திக், மட்டக்குளிய.

ஒன்று, கமல்ஹாசனுடன் இணைந்து நடிக்க வேண்டும்...இந்த ஆசை, ‘மன்மதன் அம்பு’ படத்தின் மூலம் நிறைவேறியது.
அடுத்து ரஜினிகாந்த், தெலுங்கு நடிகர் சிரஞ்சீவி ஆகிய இருவருக்கும் ஜோடியாக நடிக்க வேண்டும் என்று ஆசைப்பட்டார். ரஜினிகாந்துடன் ஜோடி சேர வேண்டும் என்ற ஆசை, ‘பேட்ட’ படத்தின் மூலம் நிறைவேறியது. சிரஞ்சீவியுடன் ஜோடி சேர வேண்டும் என்ற ஆசை ஒரு தெலுங்கு படத்தின் மூலம் நிறைவேறியது. ‘பாபநாசம்’ புகழ் ஜீத்து ஜோசப் இயக்கும் ஒரு புதிய மலையாள படத்தில் திரிஷா, மோகன்லாலுடன் ஜோடி சேர்ந்து இருக்கிறார்!
இதன் மூலம் திரிஷாவின் கனவுகள் அனைத்தும் நனவாகி விட்டது. அம்மணிக்கு வயது ஏறிக்கொண்டே போகிறது. கல்யாணம் பற்றிய பேச்சு எடுத்தாலே எரிந்து விழுகிறாராம். இதுதான் யாருக்கும் புரியலையாம்.


தமிழ் சினிமாவின் ஒரு முற்போக்கான நடிகையாக யாரைச் சொல்லலாம்?

கே.பானுஷா, இரத்தினபுரி.

வேறு யாரு நம்ம சமந்தா! அவரை நாம் சொல்வதற்கும் ஒரு காரணம் இருக்கிறது.
ஐதராபாத்தில், ஒரு பெண் கால்நடை மருத்துவர் நான்கு பேரால் வன்புணர்வுக்கு ஆளாக்கப்பட்டு எரித்து கொலை செய்யப்பட்ட சம்பவம் உலகம் முழுவதும் பர பரப்பை ஏற்படுத்தியது. எல்லோருக்கும் தெரியும். குற்றவாளிகள் என்கவுண்ட்டரில் சுட்டு கொல்லப்பட்டதற்கு எல்லோரும் பொலிசாரை பாராட்டினார்கள்.
குறிப்பாக திரையுலக பிரமுகர்கள் தங்களின் கருத்துகளை துணிச்சலுடன் வெளியிட்டார்கள். நடிகை நயன்தாரா, “இது சரியான நேரத்தில் வழங்கப்பட்ட நீதி” என்று அறிக்கை மூலம் பொலீசாரை பாராட்டினார். இந்த நிலையில் நடிகை சமந்தா, “என் கவுண்ட்டரை நான் கொண்டாட மாட்டேன். அது சந்தோஷப்பட வேண்டிய விஷயம் அல்ல” என்று கூறியிருக்கிறார்! அப்போ அவரும் முற்போக்குவாதிதானே…


சீயான் விக்ரமின் மகன் ஜெயிப்பாரா?

எஸ். அலெக்ஸ், தெமட்டகொடை.

தெலுங்கில் மெகா வெற்றிப் பெற்ற ‘அர்ஜூன் ரெட்டி’ என்றப் படத்தை தமிழில் ‘ஆதித்ய வர்மா’ என்ற பெயரில் ரீமேக் செய்திருந்தார்கள். விக்ரமின் மகன் துருவ் அப்பாவை மிஞ்சுமளவுக்கு பின்னி எடுத்திருந்தார்.
போட்ட முதலுக்கு பாதகமில்லாமல் படம் லாபம் பார்த்திருக்கிறது. இதனால் துருவ் பிழைத்துக் கொண்டார் என்று சொல்லலாம். அடுத்த படத்தில் நடிப்பதற்கு துருவுக்கு கோடிகளில் சம்பளம் பேசப்படுகிறதாம்.
வாரிசு நடிகர்களில் ஒரு சிலரை தவிர அனேகர் பிழைத்து, ஜெயித்து பெரிய மாஸ் நாயகர்களாக கல்லா கட்டும் இந்தக் காலத்தில் துருவ், விக்ரமின் செல்வாக்கில் ஜெயிப்பதற்கு அதிகமான வாய்ப்புகள் இருக்கிறது.


பிரசன்னாவுக்கு பல புதிய பட வாய்ப்புகள் வந்து கொண்டிருப்பதாக சொல்கிறார்களே உண்மையா?

ஏ.எப்.எச்.பாயிஷா, கண்டி.

சினேகா-பிரசன்னா தம்பதிக்கு ஏற்கனவே ஒரு மகன் இருக்கிறான். அவனுக்கு விரைவில் ஒரு தம்பி அல்லது தங்கை பாப்பா வர இருக்கிறார். சினேகா, 8 மாதம் கர்ப்பமாக இருக்கிறார். இன்னும் 2 மாதங்களில் அவருக்கு பிரசவம் நடக்க இருக்கிறது.
இரண்டாவது குழந்தை வரப்போகிற ராசியில், பிரசன்னாவுக்கு பல புதிய பட வாய்ப்புகள் வந்து கொண்டிருக்கின்றனவாம். இதனால் குழந்தை வரப்போகும் ராசிதான் தனக்கு கிடைக்கும் வாய்ப்புகளுக்கு காரணம் என்று பிரசன்னா தனது நண்பர்களிடம் சொல்லி வருகிறாராம்.🔴

காதல் சந்தியா இப்போது என்ன செய்கிறார்?

கே.சுமதி- வவுனியா.

செப்டம்பர் 27ஆம் தேதி 1988 ஆம் ஆண்டு பிறந்தவர் நடிகை சந்தியா. இவரின் தந்தை அஜித் இந்தியன் வங்கியில் பணிபுரிகிறார். இவரின் அம்மா அழகுக் கலை நிபுணராக இருக்கிறார். மேலும், கேரள மாநிலம் கொச்சி தான் இவர்கள் பூர்வீகம். ஆனால், சந்தியா பிறந்து வளர்ந்தது எல்லாம் சென்னையில். மேலும், சந்தியாவிற்கு ராகுல் என்ற ஒரு அண்ணனும் இருக்கிறார்.
சந்தியா தமிழ், மலையாளம், தெலுங்கு, கன்னடம் எனப் பல மொழித் திரைப் படங்களிலும் நடித்து வந்தார். அதுமட்டும் இல்லாமல் இவர் காதல் திரைப் படத்திற்காக தமிழ்நாடு மாநில விருதையும், பிலிம்பேர் விருதையும் பெற்று உள்ளார். தற்போது கூட இவரை (நீங்கள் உட்பட) அனைவரும் ‘காதல் சந்தியா’ என்று தான் அழைப்பார்கள்.

இவர் நடித்த காதல், ‘டிஸ்யும்’ படங்கள் தந்த வெற்றிக்குப் பிறகு வேறு எந்தப் படமும் பெரிய அளவு வெற்றியைத் தரவில்லை. மேலும், இதுவரை 40க்கும் மேற்பட்ட திரைப் படங்களில் நடித்திருக்கும் சந்தியா, பின் சென்னையை சேர்ந்த கம்ப்யூட்டர் துறையில் வேலை செய்யும் சந்திரசேகர் என்பவரை காதலித்து திருமணம் செய்து கொண்டார். இவர்களது திருமணம் குருவாயூர் கோயிலில் டிசம்பர் 6 ஆம் திகதி 2015 ஆம் ஆண்டு நடைபெற்றது.
மேலும், இவர்களுக்கு 2016 ஆம் ஆண்டு ஷீமா என்ற ஒரு அழகான பெண் குழந்தையும் பிறந்தது. தற்போது கணவர், குழந்தையுடன் கேரளாவில் வசித்து வரும் சந்தியா முழுநேர குடும்பத்  தலைவியாக இருக்கிறார்.


பிகில் எப்படி, வெற்றிப் படமா?
என். அஜந்தன்- யாழ்ப்பாணம்.

அட்லிகுமாரின் படம் என்பதால் சில வெற்றிப் படங்களின் தொகுப்பாக பிகில் அமைந்திருந்தது. விசில் அடிக்கும் ரசிகர்களுக்கு நல்ல தீனிதான் ‘பிகில்’ படம். அதுவும் வெற்றிப்படம்தான்.
தற்போது, ‘பாகுபலி 2’ படத்துக்குப் பிறகு தமிழகத்தில் அதிக வசூல் செய்த படம் என்ற மாபெரும் சாதனையையும் படைத்துள்ளது. தமிழகத்தில் அஜித் நடிப்பில் வெளியான ‘விஸ்வாசம்’ படத்தின் மொத்த வசூல் 135 கோடி ரூபாய்க்கும் அதிகம். இதனை ‘பிகில்’ படத்தின் மொத்த வசூல் முறியடித்து 140 கோடி ரூபாய்க்கும் அதிகம் என்ற இமாலய இலக்கை எட்டியுள்ளது.

இந்த ஆண்டு இந்திய அளவில் அதிக வசூல் செய்த தமிழ்ப் படங்களின் பட்டியலில் முதல் இடத்தைப் பிடித்துள்ளது ‘பிகில்’. அதே போல் தென்னிந்தியாவிலிருந்து இந்திய அளவில் 200 கோடி ரூபாய் வசூல் செய்த நடிகர்கள் பட்டியலில் ரஜினி, பிரபாஸ், யாஷ் மட்டுமே இடம் பெற்றிருந்தனர். அந்தப் பட்டியலில் இப்போது விஜய்யும் இணைந்துள்ளார்.
வெளிநாடுகளில் அதிக வசூல் செய்யும் தமிழ் நடிகர்கள் பட்டியலில் ரஜினிதான் எப்போதுமே நம்பர் வன். தற்போது அந்தப் பட்டியலில் இரண்டாவது இடத்தைப் பிடித்துவிட்டார் விஜய். ‘பிகில்’ படம் ரஜினி படங்களின் வசூல் பட்டியலுக்கு அப்புறமே இருந்தாலும், பல்வேறு வெளிநாடுகளில் ரஜினி படங்களின் வசூலையும் முறியடித்துள்ளது.
மலேசியாவில் ஷாருக்கானின் ‘தில்வாலே’, ரஜினி நடித்த ‘கபாலி’ ஆகிய படங்களுக்குப் பிறகு அதிக வசூல் செய்த படம் என்ற சாதனையைப் படைத்துள்ளது.
‘பிகில்’ படத்தின் பிரம்மாண்டமான வசூலின் மூலம், ரஜினிக்குப் பிறகு வெளிநாடு, இந்தியா, தமிழ்நாடு என அனைத்து விநியோகிஸ்தர்களுக்கும் வசூல் நாயகனாக வலம் வர ஆரம்பித்துள்ளார் விஜய்.


யோகிபாபுவுக்கு எப்போது திருமணம்?
ஆர். சதுர்ஷன்- கண்டி.

சமீப காலத்தில் திரைப்பிரவேசம் செய்திருந்தாலும் யோகி பாபு அவரின் பெயருக்கு அமைய ரொம்பவும் யோகமானவர்தான்.
கோலமாவு கோகிலாவில் நயன்தாரவுடன் டூயட் பாடியவர், பிறகு தர்மபிரபுவில் நாயகனாக நடித்தார்.
தற்போது, ரஜினிகாந்துடன் தர்பார் படத்தில் நடித்து வருகிறார். தற்போது அவர் கைவசம் 18 படங்கள் உள்ளன.
சமீபத்தில்தான் தான் சிறுக சிறுக சேமித்த பணத்தில் சென்னையில் ஒரு வீடு கட்டி குடி புகுந்திருக்கிறார்.
இந்த நிலையில்தான் யோகிபாபுவின் முகநூல் கணக்கில் அவர் யாரோ ஒரு பெண்ணுடன் இருப்பது போன்று ஒரு படம் ‘அவளும் நானும்’ என்ற தலைப்பில் வெளியாகி இருந்தது.
அதை பார்த்த ரசிகர்கள் யோகிபாபு திருமணம் செய்து கொள்ளப்போகும் பெண் இவர்தான் என்று பேசினர். அதோடு யோகிபாபுக்கு பலரும் வலைத்தளத்தில் வாழ்த்து தெரிவித்தனர். உங்களுக்கு மனைவியாக வருபவர் அழகாக இருக்கிறார் என்றும் பதிவிட்டனர். செல்போனில் தொடர்பு கொண்டும் வாழ்த்தினார்கள்.
இதுப் பற்றி யோகி பாபுவிடம் நாம் தொடர்பு கொண்டு கேட்டப்போது, “அந்த முகநூல் எனது பெயரில் இயங்கும் ஒரு போலியான கணக்கு, அந்த செய்தியும் உண்மையில்லை. எனக்கு பெண் பார்க்கும் வேலையை எனது பெற்றோர்கள் மேற்கொண்டு வருகிறார்கள். எனது திருமணத்தை உங்கள் அனைவருக்கும் அறிவிப்பேன்” என்று அவர் தெரிவித்தார்.
யோகிபாபுவிடமிருந்து வரும் தகவலை சதுர்ஷனுக்கு முறையாக நாம் அறிவிப்போம்.🔴

கமலின் கனவுப் படம் மருதநாயகம் வருமா?

ஆர். சுமித்திரா- நிவித்திகலை.

1997ல் மருதநாயகம் படத்தின் வேலைகள் தொடங்கப்பட்டு சில காட்சிகள் மட்டும் படமாக்கப்பட்டதோடு, பெரிய பட்ஜெட் படம் என்பதால் கணக்கு போட்டு மலைத்துப் போன மருதநாயகம் படக்குழு படத்தை நிறுத்திவிட்டது.
அந்தப் படத்தை இப்போது தொடர்ந்தால், அதில் நடித்தவர்கள் தோற்றம் மாறி இருக்கும் என்றும் நீங்கள் நினைக்கலாம்.
ஆனாலும் படத்தின் மிகவும் கடினமாக காட்சிகள் முப்பது நிமிடம் படமாக்கப்பட்டுள்ளதாகவும், அடுத்த காட்சி  12 ஆண்டுகளுக்கு பிறகு என்று காட்சிகள் விரிவதால் அந்தப் படத்தை தொடர்வதிலும் பிரச்சினை இல்லை.
ஆனாலும் கமல் இந்தப் படத்தில் நடிக்க முடியாது என்றும் தனக்கு பதிலாக வேறு ஒருவர் நடிப்பார் என்றும் கூறியிருக்கிறார். சமீபத்தில் ‘கடாரம் கொண்டான்’ படத்தை பார்த்து விட்டு நடிகர் விக்ரமை கமல் பாராட்டியிருக்கிறார். எனவே மருதநாயகமாக விக்ரம் நடிப்பதற்கும் வாய்ப்பு உள்ளது. எனவே மருதநாயகம் வெளியாகும்.

இந்த ஆண்டில் கீர்த்தி சுரேஷின் படங்கள் எதுவுமே வெளியாகாததால், அவரின் மார்க்கெட் சரியுமா..?
சி. அட்சயன், அம்பாறை.

கீர்த்திக்கு ‘2018 காட்டில் அடை மழை’ என்றே சொல்லணும். சாமி-2, சண்டைக் கோழி-2, நடிகையர் திலகம், சீமராஜா, தானா சேர்ந்த கூட்டம், சர்க்கார் என்று அடுத்தடுத்து படங்கள் வெளியாகின. ஆனால் அம்மணிக்கு யாரு கண்ணு பட்டுச்சோ 2019இல் தமிழ்ப் படங்கள் எதுவும் அவரின் கைவசம் இல்லை.
‘நடிகையர் திலகம்’ படத்தின் தோல்விக்கு பிறகு கீர்த்திக்கு தமிழில் அதிர்ஷ்டம் இல்லாமல் போய்விட்டது.
இதே வேளை தெலுங்கில் நிதினுக்கு ஜோடியாக ‘ரங்தே’ படத்தில் நடித்து வருகிறார். மலையாளத்தில் மோகன்லாலுடன் ஒரு பெரிய பிரமாண்ட படத்திலும் நடித்து வருகிறார். தமிழில் விஜய் நடிக்கும் அடுத்த படத்தில் அவருக்கு ஜோடி கீர்த்திதான். கார்த்திக் சுப்புராஜ் இயக்கவுள்ள அடுத்த படத்திலும் கீர்த்தியைதான் ஒப்பந்தம் செய்திருக்கிறார்கள். எனவே அடுத்த ஆண்டில் கீர்த்தியின் நிறைய படங்கள் வெளியாகும். மாஸ் நடிகர்களுக்கு ஜோடியாக வருவதால், இந்த இடைவெளி அவருக்கு மார்க்கெட் சரிவை ஏற்படுத்தாது.

இந்திய நடிகர்களில் இன்றைய தேதியில் அதிகம் சம்பளம் வாங்கும் நடிகர் யார்?
கே.கௌதமன்- வவுனியா.

பொலிவுட்டில் நடிகர்; ஹிருத்திக் ரோஷன் ‘வார்’ படத்திற்கு 100 கோடி வரை சம்பளமாக பெற்றுள்ளார் என்று கூறுகிறார்கள்.
இவரது நடிப்பில் வெளியான திரைப்படம் ‘வார்.’ இந்தியில் மட்டுமின்றி, தமிழ் உள்ளிட்ட மொழிகளிலும் இந்தப் படம் டப் செய்து வெளியிடப்பட்டது. இந்தப் படம் மிகப்பெரிய வெற்றியைப் பெறும் என்று அனைவரும் எதிர்பார்த்தனர். அதன்படியே மெகா வெற்றியைப் பெற்றிருக்கிறது ‘வார்’ திரைப்படம். இந்த ஆண்டில் அதிக வசூல் செய்த படமாகவும் பொலிவுட்டில் இந்தப் படம் மாறியிருக்கிறது. படம் வெளியான 15 நாட்களிலேயே ரூ.300 கோடியை தாண்டியிருக்கிறது. இந்தப் படத்தில் நடித்ததற்காக ஹிருத்திக் ரோஷனுக்கு படத்தின் வருமானத்தில் 40 சதவீதம் சம்பளமாக பேசப்பட்டதாக கூறப்படுகிறது. படத்தின் மொத்த பட்ஜெட் ரூ.170 கோடி. இதுவரை படத்தின் தியேட்டர் உரிமை, டிஜிட்டல் உரிமை, சாட்டிலைட் உரிமை, இன்னும் சில உரிமைகள் என ரூ.350 கோடிக்கும் மேல் வருவதற்கு வாய்ப்பிருப்பதாக கூறுகிறார்கள். இதை வைத்துப் பார்க்கும் போது, ‘வார்’ படத்திற்கு ஹிருத்திக் ரோஷனின் சம்பளமாக எப்படியும் ரூ.100 கோடியாவது போய் சேரும் என்று பொலிவுட் சினிமா உலகினர் அடித்து சொல்கிறார்கள்.

விஜய்க்கு வில்லனாக விஜய்சேதுபதி நடிக்கிறாராமே உண்மையா..?
என்.மயூரி- வாழைச்சேனை.

பேட்டையில் ரஜினிக்கு வில்லனாக நடித்ததற்காக எல்லா முன்னணி நடிகருக்கும் விஜய் சேதுபதி வில்லனாக நடிப்பார் என்று எல்லோரும் எதிர்பார்க்கிறார்கள்.
அதன்படியே விஜய்க்கு, விஜய்சேதுபதியை வில்லனாக்கி பார்க்க ஆசைப்பட்ட ஒரு இயக்குநர் விஜய்சேதுபதியை அணுகி அவரிடம் பேசினாராம். உடனே விஜய்சேதுபதி சம்மதம் சொன்னதால் சந்தோசப்பட்ட இயக்குநர் அவரிடம் சம்பளம் பற்றி கேட்டதற்கு 20 கோடி தாருங்கள் என்று விஜய்சேதுபதி கேட்டதால் தயாரிப்பாளரும், இயக்குநரும் ஆடிப்போய் விட்டார்களாம்.
வில்லனாக நடிப்பதை தவிர்க்கவே அவர் அவ்வளவு பெரிய தொகையை கேட்டதாக சொல்லப்படுகிறது.🔴

ஜெயலலிதாவின் வாழ்க்கை படமாகிறதாமே, ஜெயலலிதாவின் வேடத்துக்கு நடிகை ஷகீலா பொருத்தமாக இருப்பார் என்பது எனது கணிப்பு…?

ஆர்.சுதர்ஷன்- வவுனியா.

என்ன சுதர்ஷன் ஜெயலலிதாவை இப்படி சொல்லிட்டீங்களே…
‘ஒரே முறைதான் உன்னோடு பேசி பார்த்தேன்’ என்ற பாடல் காட்சியை பாருங்கள். அப்புறம் உங்களின் கருத்தை சொல்லுங்கள். நீங்கள் சொல்லும் ஷகீலா ஒரு வேளை வயதான ஜெயலலிதாவின் வேடத்துக்கு பொருந்தலாம்.
இயக்குநர் விஜய் இயக்கத்தில் ‘தலைவி’ என்ற பெயரில் படமாகும் ஜெயலலிதாவின் வேடத்தில் கங்கனா ரணாவத் நடிக்கிறார். தமிழ், தெலுங்கு, இந்தி ஆகிய 3 மொழிகளில் இந்த படம் தயாராகிறது.
கங்கனா ரணாவத் ஜெயலலிதாவின் வேடத்தில் நடிப்பதற்காக 20 கோடி சம்பளம் கேட்டுள்ளாராம்.

தலைவி படத்தில் கங்கனா ரணாவத் நான்கு காலகட்டங்களில் நான்கு விதமான தோற்றங்களில் வருகிறார் என்றும் அவரது தோற்றங்களை ஹங்கர் கேம்ஸ், கேப்டன் மார்வல், பிளேட் ரன்னர் உள்ளிட்ட ஹாலிவுட் படங்களில் பணியாற்றிய ஒப்பனை கலைஞர் ஜேசன் கொலின்ஸ் வடிவமைக்கிறார்.
சமீபத்தில் இவருக்கு அமெரிக்காவின் லாஸ் ஏஞ்சலீஸ் நகரில் மேக்கப் போட்டு பார்க்கப்பட்டதாம்.
ஜெயலலிதாவின் வேடம் கங்கனா ரணாவத்துக்கு கனகச்சிதமாக பொருந்தியும் விட்டிருக்கிறதாம். ஆகவே உங்கள் ஷகீலா தெரிவு சரிபட்டு வராது!

திரிஷாவுக்கு அடுத்த இடத்தில் மூத்த நடிகை அந்தஸ்தை யாருக்கு கொடுக்கலாம்.?
ஆர். கீதா- கிராண்பாஸ், கொழும்பு-14

சந்தேகமேயில்லாமல் தமன்னாவுக்கு கொடுக்கலாம். 13 வருடங்களாக திரைத்துறையில் இருக்கிறார். சைரா நரசிம்மா ரெட்டி, பெட்ரோமாக்ஸ், ஆக்ஷன் என்று அடுத்தடுத்து படங்கள் வெளியாக உள்ள நிலையில் இப்போதும் பிஸியாக அவர் இருப்பது சாதனைதானே!

“எல்லாரையும் போல நானும் லட்சியத்தோடுதான் சினிமா துறைக்கு வந்தேன். அந்த லட்சியத்தை முதல் படத்திலேயே அடைந்து விட்டேன். 13 வருடங்கள் கதாநாயகியாக எனது பயணம் நீடித்துக் கொண்டு இருப்பது மகிழ்ச்சி அளிக்கிறது. இவ்வளவு பெயரையும் புகழையும் முன்பே எதிர்பார்க்கவில்லை. சினிமா என்றால் எனக்கு விருப்பம். அதனால்தான் நடிகையானேன்.
நட்சத்திர அந்தஸ்து என்பது சினிமாவுக்கு வந்த புதிதில் என் மனதில் இருக்கவில்லை. நடிகையாக கேமரா முன்னால் வந்ததுமே எனது லட்சியம் நிறைவேறி விட்டது. மற்றதெல்லாம் போனஸ்தான். எந்தத் துறையாக இருந்தாலும் செய்கிற வேலையை விருப்பத்தோடு செய்தால் எல்லாமே நம்மை தேடி வரும்.” என்று சமீபத்தில் தமன்னா ஒரு நேர்காணலில் சொல்லியிருக்கும் பொன் மொழிகள்.

வரலாற்று படங்கள் வெற்றிப் பெறுமா..?
கே.எப்.எச். அஸ்னா- கெக்கிராவை.

இந்தியாவில் அதிக பொருள் செலவில் தயாரிக்கப்பட்ட பாகுபலி திரைப்படங்கள் இரண்டும் மெகா வெற்றியை கொடுத்ததே மறந்து விட்டீர்களா…
இப்போது இந்திய பெறுமதியில் 800 கோடி செலவில் இரண்டு பாகங்களாக கல்கியின் பொன்னியின் செல்வன் கதையை படமாக்கும் வேலையும் நடைபெற்று வருகிறது.
இந்த படத்தில் நடிக்க அனைத்து மொழிகளில் இருந்தும் 14 முன்னணி நடிகர்-நடிகைகள் தேர்வாகி இருப்பதாக கூறப்படுகிறது.
பொன்னியின் செல்வன் படத்துக்காக தலைமுடியை நீளமாக வளர்க்கும்படி கதாநாயகர்களிடம் மணிரத்னம் கேட்டுக்கொண்டு இருக்கிறார். சரித்திர காலத்து கதை என்பதால் மன்னர் உள்பட அனைத்து ஆண் கதாபாத்திரங்களுக்கும் தலை முடி நீளமாக இருக்க வேண்டும் என்பதற்காக இந்த அறிவுரையை வழங்கி இருக்கிறார். அதன்படி நடிகர்கள் தலைமுடியை நீளமாக வளர்க்கும் முயற்சியில் ஈடுபட்டு உள்ளனர். இந்த படத்துக்கு ஏ.ஆர்.ரகுமான் இசையமைக்கிறார். ரவிவர்மன் ஒளிப்பதிவு செய்கிறார். பாடல்களை வைரமுத்து எழுதுகிறார்.
தாய்லாந்தில் உள்ள காடுகளில் 100 நாட்கள் படப்பிடிப்பை நடத்தப் போகிறார்கள்.

இதே வேளை பாகுபலியை மிஞ்சும் கிராபிக்ஸ் காட்சிகளுடன் அதிக பொருட் செலவில் இராமாயணம் படத்தை மலையாளத்தில்  எடுக்கின்றனர். இது மூன்று பாகங்களாக மூன்று மொழிகளில் தயாராகிறது.
பிரபல தெலுங்கு பட அதிபர் அல்லு அரவிந்த், மது மஞ்சனா, நமித் மல்கோத்ரா ஆகியோர் தயாரிக்கின்றார்கள்.
இந்த படத்தில் இராமன் கதாபாத்திரத்தில் ஹிருத்திக் ரோஷன் நடிக்கிறார். சீதையாக நடிக்க சினேகாவிடம் பேசி வந்தனர். தற்போது அவருக்கு பதில் தீபிகா படுகோனே நடிக்க இருப்பதாக கூறப்படுகிறது. ராவணன் கதாபாத்திரத்தில் நடிக்க பிரபாசிடம் படக்குழுவினர் பேசி வருவதாக தகவல் வெளியாகி உள்ளது. ராவணன் வேடத்துக்கு பிரபாசின் தோற்றம் பொருத்தமாக இருக்கும் என்று கருதுகிறார்கள்.

பராட்டா சூரி நாயகனாக நடிக்கப் போகிறாராமே, சரிபட்டு வருமா?
என்.ரேகா-  மொரட்டுவை.

கதாநாயகர்களாக மாறிய நகைச்சுவை நடிகர்கள் கவுண்டமணி, வடிவேல், விவேக், கருணாஸ், சின்னி ஜெயந்த், சந்தானம், ஆர்.ஜே.பாலாஜி, யோகிபாபு வரிசையில் இப்போது சூரியும் சேர்ந்து இருக்கிறார்.
நாயகர்களாக நடிக்க ஆசைப்பட்டு காணாமல் போன நகைச்சுவை நடிகர்கள்தான் அதிகம். அந்த லிஸ்டில் சூரி வருவாரா என்பதை காலம் தான் முடிவு செய்யும். ஆனாலும் சூரி ரொம்பவும் உசாரான பேர்வழி, ரொம்ப கவனமாக இருப்பார் என்று கோடம்பாக்க நண்பர்கள் சொல்கிறார்கள்.
வெண்ணிலா கபடிக் குழு படத்தில் அறிமுகமான சூரி இதுவரை 60 பது படங்களில் நடித்துள்ளார். இப்போது வெற்றிமாறன் இயக்கவுள்ள படத்திலேயே இவர் நாயகனாக நடிக்க இருப்பதாகக் கேள்வி.🔴

சினிமானந்தா பதில்கள்

இலங்கை திரையுலகில் நடிகை ருக்மணி தேவிக்கு பிறகு ஜொலிக்கும் தமிழ் நடிகை பூஜாதானே..?

கே. பிரியதர்ஷனி,  கெக்கிராவை.

இலங்கையின் சிங்கள தாயாருக்கும், பெங்களுரைச் சேர்ந்த தகப்பனுக்கும் பிறந்தவர்தான் நடிகை பூஜா உமா சங்கர். அவர் ஒரு இந்திய நடிகை. இந்திய திரையுலகில் நடித்துக்கொண்டிருந்தவர் அங்கே மார்க்கெட் சரிந்ததும் இலங்கைக்கு வந்துவிட்டார்.

அதனால் அவரை இலங்கை நடிகை என்று சொல்ல முடியாது. அந்த வகையில் தற்போது இலங்கை திரையுலகில் ஜொலிக்கும் நடிகையாக இருப்பவர் நிரஞ்சனி சண்முகராஜா.
இவர் கண்டியை பிறப்பிடமாக கொண்ட ஒரு தமிழச்சி!
நடிகை ருக்மணி தேவிக்கு பிறகு சிங்களப் படங்களில் நாயகியாக வலம் வருகிறார்.
இலங்கை தமிழ் தொலைக்காட்சியின் நிகழ்ச்சி தொகுப்பாளினியாக பணியாற்றியவர் ‘இனியவன்’ படத்தின் மூலம் திரையுலக பிரவேசம் செய்தார்.
இனியவன் படத்தில் நடித்ததிற்காக இவருக்கு சிறந்த நடிகைக்கான விருதும் வழங்கப்பட்டது.
அதனை தொடர்ந்து ‘ரது சமனல சிஹினய’, ‘கோமாளி கிங்ஸ்’, ‘சன்ஸ் பாதர்ஸ்’, ‘சொப்பன சுந்தரி’, ‘சுனாமி’, உள்ளிட்ட படங்களோடு, இலங்கையில் அதிக பொருட்செலவில் தயாரிக்கப்பட்டுள்ள ‘கிரிவெசிபுர’ என்ற வரலாற்று படத்திலும் நாயகியாக நடித்திருக்கிறார்.
இன்றைய திகதி வரையிலும் நிரஞ்சனிதான் முன்னணியில் ஜொலிக்கிறார், யாருக்கு தெரியும் நாளை இவருக்கு போட்டியாக இன்னொருவர் களமிறங்கினாலும் ஆச்சர்யப்படுவதற்கில்லை.

நயனுக்கு இந்த மாதம் திருமணம் நடக்கப் போகிறதாமே!
ஆர்.கீர்த்தி, கஹவத்தை.

இன்றைய தமிழ் திரையுலகில் சூடான காதல் ஜோடின்னா அது நயன், விக்னேஷ்சிவன்தான். இவர்கள் இருவரும் செய்யும் காதல் லூட்டிகளை பார்த்து பலரும் புகைந்து போகிறார்களாம், இவர்கள் இருவரும் காதலித்து வரும் நிலையில் இதுவரை தங்கள் திருமணம் பற்றி எந்த ஒரு வார்த்தையையும் தெரிவிக்கவில்லை. ஆனால், இவர்கள் இருவரும் அடிக்கடி ஊர்ச்சுற்றிக் கொண்டும், நெருக்கமாக புகைப்படங்களை எடுத்துக்கொண்டு அதனை சமூக வலைத்தளங்களில் பதிவிட்டு வருவதை வாடிக்கையாகவும் வைத்து வருகின்றனர்.
சமீபத்தில் பேட்டி ஒன்றில் பங்கேற்ற விக்னேஷ் சிவனிடம், நயன்தாரவுடன் எப்போது கல்யாணம் என்று கேள்வி கேட்கப்பட்டுள்ளது. அதற்கு பதிலளித்த விக்னேஷ் சிவன், இன்னும் தெரியலயே, தெரிந்தது என்றால் சொல்லலாம் தெரியாத விஷத்தை பற்றி கேட்டால் என்ன சொல்வது? என் கல்யாணத்த பத்தி என்னோட அம்மாகிட்ட கேட்டு உங்களுக்கு சொல்றேன் என்று மழுப்பலான ஒரு பதிலை அளித்துள்ளார்.
இதேவேளை சமீபத்தில் அத்திவரதரை இந்த காதல் ஜோடி தரிசித்துவிட்டு வந்திருக்கிறார்கள்.
இருவரும் ஒரே அறையில் தங்குகிறார்களாம் அப்போ அவங்க கணவன், மனைவிதானே இனி என்ன திருமணம்..?

அமலாபாலுக்கு திருமண ஆசை இல்லையா..?
என். கேதீஸ், வவுனியா.

திருமண ஆசை சலித்து விட்டதால்தானே இயக்குனர் ஏ.எல்.விஜயிடமிருந்து விவாகரத்து வாங்கிவிட்டு பிரிந்திருக்கிறார்.
கொஞ்ச காலம் அமலாபால் நினைவாகவே இருந்த இயக்குனர் ஏ.எல்.விஜய் இப்போது ஐஸ்வர்யா என்ற மருத்துவரை திருமணம் முடித்து குடுப்பமாகி விட்டார்.
ஆனால் அமலாபால் ஒரு சுதந்திர பறவையாக பறந்து கொண்டிருக்கிறார்.
திறமையான நடிகையான அமலாபால் திருமண வாழ்க்கைக்கு பிறகு படங்களில் முழுமையாக கவனம் செலுத்தி நடித்து வருகிறார்.
‘ஒரு முறை திருமண வாழ்க்கையில் பட்ட அவஸ்தைகள் போதும் இனி அதுல போய் மாட்டிக்க கூடாது’ என்பதில் அவர் ரொம்பவும் கவனமாக இருக்கிறார்.
நீங்க வேற சும்மா அவருக்கு திருமண ஆசையை வளர்காதீர்கள்.


கிழக்கு ஆப்பிரிக்காவில் ராஜு திரைப்படம் வருவதற்கான எந்த அறிகுறியும் தெரியவில்லையே…?
வாத்தியார் ரசிகன் ஆர். ஞானசேகரன், களுவாஞ்சிக்குடி.

எம்.ஜி.ஆர் முதலமைச்சர் ஆன பிறகு உலகம் சுற்றும் வாலிபன் இரண்டாவது பாகமாக எடுக்கத் திட்டமிடப்பட்டது. ஆனால் எம். ஜி. ஆருக்கு நேரமின்மை காரணமாக கைவிடப்பட்டது.
அந்த படத்தை தற்போது புதிய அனிமேஷன் தொழில் நுட்பத்தை பயன்படுத்தி
கிழக்கு ஆப்பிரிக்காவில் ராஜூ’ என்ற படத்தை ஐசரி கணேஷ் தயாரித்து வந்தார்.
ஆனாலும் படத்தின் அரைவாசி படப்பிடிப்பு முடிவடைந்த நிலையில் பணப் பிரச்சினை காரணமாக  பட வேலைகளை நிறுத்தி வைத்திருக்கிறார்கள்.
முப்பது ஆண்டுகளுக்கு பிறகு எம்.ஜி.ஆரின் கனவை நனவாக்க சிலர் எடுத்த முயற்சிகள்தான் இந்தப் படம். ஆனால் இந்தப் படமும் இழுப்பறி நிலையில் வரும் ஆனா வராது என்ற நிலையில்தான் இருக்கிறது.

பொன்னியின் செல்வன் வரலாற்றை திரைப்படமாக்கும் முயற்சி நடைபெறுகிறதாமே..?

ஆர். கௌசல்யா- மட்டக்களப்பு.

பிரபல இயக்குனர் மணிரத்தினம் இந்த பெரு முயற்சியில் இறங்கியிருக்கிறார்.
படத்தில் நடிக்கும் நடிகர்கள் தேர்வும் நிறைவு பெற்றுள்ளது.
வந்தியத்தேவனாக கார்த்தி, அருள்மொழிவர்மனாக  ஜெயம்ரவி, பூங்குழலியாக நயன்தாரா, சுந்தரசோழனாக அமிதாப்பச்சன் நடிக்கின்றனர். ஆதித்த கரிகாலனாக விக்ரம், குந்தவையாக கீர்த்தி சுரேஷ் ஆகியோர் நடிப்பதாகவும் தகவல் வெளியாகி உள்ளது. நந்தினி கதாபாத்திரத்துக்கு ஐஸ்வர்யாராய், பழுவேட்டரையர் வேடத்துக்கு சத்யராஜ் ஆகியோர் தேர்வு செய்யப்பட்டு உள்ளனர். இந்த நிலையில் தற்போது அமலாபால், ஐஸ்வர்யா லட்சுமி ஆகியோரும் முக்கிய கதாபாத்திரத்தில் நடிக்க தேர்வு செய்யப்பட்டு உள்ளார்கள்.
கதையில் 60-க்கும் மேற்பட்ட முக்கிய கதாபாத்திரங்கள் உள்ளன எனவே மேலதிக பாத்திரங்களுக்கான தேர்வு தற்போது நடைபெறுகிறது. விரைவில் இறுதி பெயர் பட்டியல் வெளியாகும்.
பொன்னியின் செல்வன் தமிழ், தெலுங்கு, இந்தி ஆகிய 3 மொழிகளில் தயாராகிறது. ரூ.800 கோடி செலவில் இரண்டு பாகங்களாக இந்த படத்தை எடுக்கின்றனர். பாகுபலியை மிஞ்சும் கிராபிக்ஸ் காட்சிகளை புகுத்தவும் திட்டமிட்டு உள்ளனர்.


இன்றைய திகதியில் நம்பர் வன் கதாநாயகி யார்?
ஏ. அஷ்வினி- யாழ்ப்பாணம்.

வேற யாரு நம்ம நயன்தாராதான்.
தென்னிந்திய நடிகைகளில் நயன்தாரா முதல் இடத்தில் இருக்கிறார். ஒரு படத்துக்கு ரூ.5 கோடி கேட்பதாக தகவல். தமிழ், தெலுங்கு, மலையாள பட உலகில் தொடர்ந்து நயன்தாராவே நம்பர்-1 இடத்தில் இருக்கிறார்.
திருமணத்திற்கு பிறகு நடிக்க வந்த நடிகைகளில் நம்பர் வன் சமந்தா, அவர் ஒரு படத்துக்கு 3 கோடி சம்பளம் வாங்குகிறார்.
ராட்சசி, ஜாக்பொட் படங்களுக்கு பிறகு ஜோதிகாவும் பெரிய சம்பளம் கேட்பற்கு தயாராக இருக்கிறாராம். இன்னும் அவரின் கணக்கு என்னன்னு தெரியவில்லை.
இந்தியில் அதிக சம்பளம் பெறும் நடிகைகள் பட்டியலில் கங்கனா ரணாவத் முதல் இடத்தில் இருக்கிறார். இவர் ஒரு படத்துக்கு ரூ.14 கோடி வாங்குகிறார். தீபிகா படுகோனே ரூ.13 கோடி பெற்று 2-வது இடத்தில் இருக்கிறார்.


கோவை சரளா மெகா சீரியலுக்கு வந்து விட்டாரா..?
என். ஜோதி- மஸ்கெலியா.

சன் தொலைக்காட்சியில் ஒளிபரப்பாகும் அருந்ததி தொடரின் புரமோசனுக்காகவே அவர் சில காட்சிகளில் வந்து போனார் அவ்வளவுதான். தொடர்ந்து மெகா சீரியலில் நடிக்கும் எண்ணம் அவருக்கு இல்லையாம்.
தற்போது நடிகர்-நடிகைகள் வெப் தொடர்களில் நடிப்பதை வழக்கமாக கொண்டிருக்கிறார்கள்.

பிரசன்னா வெப் தொடரில் நடித்துள்ளார். பிரியாமணி பேமிலிமேன் தொடரிலும் நித்யாமேனன் பிரீத் தொடரிலும் நடித்து வருகிறார்கள்.
பாபி சின்ஹாவும் வெப் தொடரில் நடிக்கிறார். நிக்கி கல்ராணியின் சகோதரி சஞ்சனா கல்ராணி தளபதி என்ற தொடரில் நடிக்கிறார்.
இந்த நிலையில் பிரபல நடிகை காஜல் அகர்வாலும் வெப் தொடருக்கு மாறி இருக்கிறார்.
வெப் தொடர்களில் நடிக்க முன்னணி நடிகர்கள் பலர் ஆர்வமாக இருக்கிறார்களாம்.

கிரிக்கெட் வீரர் முத்தையா முரளிதரனின் வாழ்க்கை வரலாற்றை திரைப்படமாக எடுக்க போகிறார்களாமே..?
ஆர். சுமி- இரத்தினபுரி.

புகழ்பெற்ற கிரிக்கெட் வீரர்களான தோனி, சச்சின் டெண்டுல்கர் ஆகியோரது வாழ்க்கை வரலாறு படங்களாக வெளியாகியுள்ள நிலையில் முத்தையா முரளிதரனின் வரலாறு படமாக்கப்படவுள்ளது.
இதில் முத்தையா முரளிதரன் வேடத்தில் விஜய் சேதுபதி நடிக்கிறார். இப்படத்தை இயக்குனர் ஸ்ரீபதி இயக்கவுள்ளதாகவும், தார் மோஷன் பிக்சர்ஸ் நிறுவனம் அதனை தயாரிக்க முடிவு செய்துள்ளதாகவும் தகவல் வெளியாகியுள்ளன.

மேலும் சர்வதேச போட்டிகளில் முத்தையா மொத்தமாக 800 விக்கெட்டுகளை வீழ்த்தியதால் படத்துக்கு ‘800’ என பெயரிட உள்ளதாகவும் கூறப்படுகிறது.
ஆனாலும் முத்தையா முரளிதரனின் வேடத்தில் விஜய் சேதுபதி நடிக்க கூடாது. என்று விடுதலை சிறுத்தைகள் கட்சி எச்சரிக்கை விடுத்தள்ளது.
முத்தையாவுக்கு எதிராக தமிழ் நாடு  ஊடகங்கள் பலவும் களத்தில் குதித்துள்ளதால் ‘800’ படத்திற்கு சிக்கல் ஏற்பட்டுள்ளது.
தமிழக உணர்வாளர்களின் எதிர்பை மீறி விஜய் சேதுபதி முத்தையாவின் வேடத்தில் நடிப்பாரா என்று பொருத்திருந்துதான் பார்க்க வேண்டும்.

முன்னணி நடிகைகள் படத்தில் ஒரு பாடல் காட்சிக்கு மட்டும் நடித்தால் அவர்களின் மார்க்கெட் சரிந்ததாக கருதலாமா?

ஆர்.தனுஜன்-  வவுனியா

நிச்சயமாக இல்லை, சில வருடங்களுக்கு முன்னாள் ரஜினி, ஸ்ரேயா ஜோடியாக நடித்த சிவாஜி படத்தில் ‘பல்லேலக்கா…’ பாடல் காட்சியில் மட்டுமே நயன்தாரா நடித்திருந்தார்.  அப்போ அவரின் மார்க்கெட் சரிந்து விட்டதா, இன்னும் நயன்தானே தமிழ் சினிமாவில் நம்பர் வன் நடிகையாக இருக்கிறார்.
தற்போது படப்பிடிப்பிலிருக்கும் நயன்தாரா நாயகியாக நடிக்கும் ஒரு படத்தில் தமன்னா ஒரு பாடலுக்கு கவர்ச்சி நடனம் ஆடுகிறாராம்.

இதுபற்றி தமனாவிடம்  கேட்தற்கு, ‘நான் எனக்கு பிடித்த ஹீரோவுக்காகவே ஆடினேன். இதுபற்றி நான் கவலைப்படவில்லை. ஒரு பெரிய நடிகருக்காக, அவர் மீது நான் வைத்திருக்கும் மரியாதைக்காகவே கவர்ச்சி நடனம் ஆடினேன்’ என்று விளக்கம் சொல்கிறார்! எனவே ஒற்றை பாடலுக்கு முன்னணி நடிகைகள் நடனம் ஆடுவது அவர்களின் தனிப்பட்ட விருப்பம். எனவே குத்துப் பாட்டை அவரது மார்க்கட் நிலவரத்துடன் தொடர்புபடுத்திப் பார்க்க வேண்டியதில்லை.


ஹன்சிக்கா என்ன செய்றாங்க, இப்போ என்ன படம் பண்ணுறாங்க?
எஸ். சந்திரலதா- கஹவத்தை

தமிழிலும், தெலுங்கிலும் ஒரு ரவுண்ட் வந்தவர், முன்னணி நாயகிகளை எல்லாம் பின்னுக்குத் தள்ளிவிடுவார் என்று எதிர்பார்க்கப்பட்டபோது யாரு கண்ணுபட்டதோ அம்மணிக்கு பட வாய்ப்புகள் திடீரென்று குறைந்து போனது.
இதற்கு அவரது உடல் வாகும் ஒரு காரணமாக சொல்லப்பட்டது! ஆகவே, கொழுக் மொழுக்கென இருந்த தனது உடலை, கடுமையான உடற் பயிற்சிக்குப் பிறகு குறைத்திருக்கிறார் ஹன்சிகா! இந்த முயற்சிக்கு நல்ல பலன் கிடைத்திருக்கிறது! கதாநாயகிக்கு முக்கியத்துவம் உள்ள புதிய த்ரில்லர் படம் ஒன்றில் தற்போது நடித்து வருகிறார்.
அதோடு சிம்புவுடன் மஹா, ஆதியுடன் பாட்னர், அதர்வாவுடன் 100 உள்ளிட்ட படங்களும் ரிலீசுக்கு காத்திருக்கின்றன.
இந்தப் படங்கள் கை கொடுத்தால் ஹன்சிக்கா இன்னொரு ரவுண்ட் வருவார் என்று எதிர்பார்க்கலாம். ஆனால் ஒன்று, இரண்டாவது இன்னிங்சில் ஒரு நடிகை ஸ்கோர் பண்ணுவது மகா கடினம். குஷ்பு போனபின் ஹன்சியை குஷ்புவாக ரசிகர்கள் பார்த்ததால்தான் ஒரு ‘ஹன்சி பரபரப்பு’ ஏற்பட்டது. ஆனால் குஷ்பு மெலிவதற்கு முயற்சி செய்யவே இல்லை. எனவே ஹன்சிக்காவின் இரண்டாம் வருகை புஸ்வானமாகவும் ஆகிவிடலாம்!

“அனுஷ்கா ரொம்பவும் மெலிந்து விட்டாராமே உண்மையா?”
என். வருண்- கெக்கிராவை

 அனுஷ்கா திடீரென்று தனது உடல் எடையை குறைத்திருப்பது உண்மைதான். ஆனால் காரணம்தான் என்னவென்று தெரியவில்லை. ஒரு வேளை பாகுபலி பிரபாஸ்சுடனான காதல் நட்பு முறிந்ததால் சோகத்தில் இருக்கிறாரோ…?
அனுஷ்காவின் எடை குறைந்த காரணத்தை கண்டுபிடிக்க சில பத்திரிகையாளர்கள் பிரபாஸிடம் கேட்டப்போது, தனக்கு எதுவும் தெரியாது என்று கோபமாக பதில் சொல்லியிருக்கிறார். அனுஷ்காவுக்கு அவ்வப்போது ஏதாவது ஒரு கஷ்டம் வந்துகொண்டுதான் இருக்கிறது!

இந்தியன் 2 வெளிவருமா?
எம். யாஷினி- அட்டன்

பட்ஜெட் பிரச்சினை காரணமாக லைகா நிறுவனம் படத்தில் இருந்து வெளியேறிவிட்டது என்றும் அதனால் படம் கைவிடப்பட்டது என்றும் சில காலமாக அடுத்தடுத்து இந்தப் படம் பற்றிய செய்திகள் உலா வந்தன.
ஆனால் இந்தியன் படம் திட்டமிட்டப்படி விரைவில் தயாரிக்கப்படும் என்று ஷங்கர் தரப்பு சொல்கிறது.

லோக்சபா தேர்தல் முடிவுகள் வெளியானதும் படப்பிடிப்பு மீண்டும் துவங்கும் என்று எதிர்பார்க்கப்பட்டது. ஆனால் இன்று வரை அதற்கான முன்னெடுப்புகள் எதுவும் நடைபெறுவதாக தெரியவில்லை.
கமல் முழுநேர அரசியலில் இறங்குவதற்காக தமது சினிமா வாழ்க்கையை துறக்கப்போவதாக அறிவித்திருக்கிறார். தனது கடைசி படம் இந்தியன் 2 தான் என்று அவர் சொல்லியிருப்பதால் இந்தியன் 2 இப்போதைக்கு வெளியாவதற்கு வாய்ப்பில்லை.
கமல் இன்னும் இரண்டு படங்களில் நடித்த பிறகே இந்தியன் 2 வில் நடிப்பார். எனவே  இந்தியன் 2 இப்போதைக்கு வருவதற்கான எந்த அறிகுறியும் இல்லை.

சினிமானந்தா பதில்கள்

நடிகை சகிலாவை நீங்கள் உரிமையோடு ‘நம்ம’ என்று சொன்னதிலிருந்தே புரிகிறது நீங்கள் சகிலாவின் தீவிர ரசிகர் என்று. வறுமையின் காரணமாக திரை உலகுக்கு வந்தவரை மலையாள பட உலகம் அவரை பலான நடிகையாக உருவாக்கியது. சகிலாவின் படங்கள் வெளியான போது மலையாள சூப்பர் ஸ்டார்களான மம்முட்டி,மோகன்லால் படங்கள் இவரின் படங்களோடு நிற்க முடியாமல் ஒதுங்கிக்கொண்டன என்பது மறுக்க முடியாத உண்மை. மாயக்கா, காட்டு குதிரை, டியூசன் டீச்சர் என்று தமிழில் டப்  செய்யப்பட்ட  படங்கள் தமிழகத்திலும், நம்ம நாட்டிலும் சக்கை போடு போட்டதெல்லாம் தனி வரலாறு. பதின்ம வயது பையன்கள் முதற் கொண்டு பல்லுப்போன பெருசு வரை இந்த அக்காவின் அழகில் மயங்கித்தான் கிடந்தார்கள்.
பிறகு மலையாள திரையுலகில் யாரு செய்த சதியோ தெரியவில்லை, சகிலாவுக்கு வாய்ப்புகள் குறைந்து மீண்டும் பணக்கஷ்டத்துக்கு ஆளானார். அதன் பிறகு கேராளாவில் இருக்க முடியாமல் சென்னைக்கு வந்தார். அவருக்கு நெருக்கமான தோழியான திருநங்கை ரேவதியின் வீட்டில் தங்கினார்.
அவ்வப்போது தமிழ் சினிமாவில் சின்ன சின்ன வேடங்களில் வந்தார். இவர் தோன்றிய காட்சிகளில் எல்லாம் சகிலாவை ‘அந்த’ மாதிரியான பார்வையிலேயே நகைச்சுவை என்ற பெயரில் கதை அமைக்கப்பட்டு சந்தானம், பராட்டா  சூரிகளால் கலாய்க்கப்பட்டதால் மனசு நொந்து போய் இருக்கிறாராம்.
‘எப்படியாவது ஒரு நல்ல குணசித்திர வேடத்தில் நடித்து தாய்க்குலங்களின் மனசை வெல்லணும்' என்பது அம்மணியின் இலட்சியம்! ஆனால் யாரும் வாய்ப்பு கொடுப்பதாக தெரியவில்லை.


தமிழ் சினிமாவின் திமிரு பிடிச்ச நடிகர் விஷால் என்று என் நண்பி சொல்கிறாள் உண்மையா?

எஸ்.ரேகா- மொரட்டுவை.

அப்படிதான் நிறைய பேர் நினைச்சுட்டு இருக்காங்க, ஆனா அந்த மனுஷன் பாவம் அப்பாவி எல்லோரையும் மதிக்க தெரிஞ்சவர் கோபத்துல பொங்குவது உண்மைதான் ஆனா கோபம் இருக்கிற இடத்துலதானே குணம் இருக்கும்.னு உங்களுக்கு தெரியாதா…திமிரு பிடித்தவர் என்று தமிழ் திரையுலகில் தற்போது பேசப்படும் நடிகராக இருப்பவர் சிவகார்த்திகேயன்.

மெரினாவில் நடித்த போது ஊடகங்களுக்கு தானே போன் போட்டு செய்திகளை வழங்கியவர் இப்போது வரும் எந்த தொலைபேசி அழைப்புகளையும் எடுப்பதில்லையாம். இதனால் சினிமா செய்தியாளர்கள் இவர் மீது ரொம்பவும் கடுப்பில் இருக்கிறார்களாம். படத்துக்கு படம் சம்பளத்தை உயர்த்தி இன்று ‘15 கோடி கொடுத்தால்தான் நடிப்பேன்’னு சொல்வதெல்லாம் ரொம்ப ஓவர்  என்று தயாரிப்பாளர்களும் இவர் மீது எரிச்சலில் இருக்கிறார்களாம்.


இருட்டு அறையில் முரட்டுக்குத்து பட நாயகி யாஷிகா ஒரு புரட்சியாளராமே, உண்மையா?

என். சுமன்- வெள்ளவத்தை

அட, நீங்க வேற ‘கல்யாணத்துக்கு முன்னால பெண்களுக்கு கன்னித் திரை கிழிஞ்சிருந்தா தப்பேயில்லை அதையெல்லாம் ஆண்கள் டோன்ட்கேர் பொலிஸியா எடுத்துக்கிட்டு போய்கிட்டே இருக்கணும்’ என்று இவர் புரட்சி வசனம் பேசியதால் கெட்ட கெட்ட வார்த்தையால காதெல்லாம் கருகிற மாதிரி திட்றாய்ங்களாம். ஆனா யஷிகா அதைப்பத்தியெல்லாம் கவலைப்படாமல் ‘தான் கருத்து சொல்வதற்கு தயங்கமாட்டேன். இன்னும் வெளிப்படையாக பேசுவேன்’ என்று சொல்லி வருவதால் ஒரு வேளை கருத்து கன்னியாக வருவாரோ…

அஜித் நயன்தாரா ஜோடியாக நடிப்பார்களா?

எஸ். சண்முகம், கொழும்பு 14.

பில்லா, ஏகன், ஆரம்பம் ஆகிய படங்களிலே அஜித் நயன்தாரா ஜோடி சேர்ந்திருந்தார்களே. நீங்கள் பார்க்கவில்லையா?
உங்கள் ஆவலை பூர்த்தி செய்ய அஜித் - நயன் ஜோடி விஸ்வாசம் படத்தில் 4 ஆவது முறையாக நடித்துள்ளனர். இவருவம் கணவன் மனைவியாக அப்பாத்திரத்தில் நடித்துள்ளதாக கூறப்படுகிறது. எதிர்வரும் பொங்கல் வரும் வரை காத்திருங்கள். அஜித் நயன் ஜோடியை மீண்டும் திரையில் காணலாம்.


தேவயானியின் தம்பி நகுலை காணவில்லையே!
சோமநாதன், கண்டி

‘செய்’ என்ற புதுப் படத்தில் நடிக்கிறார் நகுல். வித்தியாசமான கதைகளில் நல்ல பாத்திரங்களைத் தேர்ந்தெடுத்து நடிக்க வேண்டும் என்பதால் தான் இந்த தாமதம் என்கிறார் நகுல்.

‘நாக்க முக்க’ என்ற ஒரேயொரு பாடல் எனக்கு உலகப் புகழைத் தேடிக் கொடுத்திருக்கு என்று நன்றியோடு நினைவு கூரும் நகுல் ‘எரியும் கண்ணாடி’ என்ற புதிய படத்திலும் நடிக்கவிருக்கிறார்.



சினிமாவில் நடிகைகள் உடுத்தும் உடைகளைத் தான் கல்லூரி மாணவிகள் வெளியில் உடுத்துகிறார்களாமே?
மஜாசபின் - கொழும்பு

மும்மையில் நடக்கும் பொது விழாக்களுக்கு நடிகைகள் எல்லை மீறிய கவர்ச்சி உடைகளில் வருகிறார்கள். இந்தி நடிகை மலைக்கா அரேரா அண்மையில் படவிழா ஒன்றுக்கு அணிந்து வந்த ஜீன்ஸ் எல்லை மிறும் வகையில் இருந்தது.

பொது இடங்களில் இவ்வாறு மோசமான உடை அணியலாமா என்று ரசிகர்கள் கண்டனம் தெரிவித்து வருகின்றனர். தமிழ் நடிகை ரெஜினாவும் இதுபோல் எல்லை மீறிய கவர்ச்சி உடையில் வந்து  நன்றாக வாங்கிக் கட்டிக் கொண்டார், ஒரு தடவை!
(படத்திலிருப்பவர் ரெஜினா)

இத்தாலியில் நடந்த விராட் கோலி-அனுஷ்கா சர்மா திருமணத்தை மிஞ்சி விட்டதாமே பொலிவுட்டின் ரன்வீர்சிங்-தீபிகா படுகோன் திருமணம்?
கவிதா – பாதுக்க

கடந்த மாதம் வட இந்தியா முழுவதும் ‘தீப் வீர்’ திருமணம் பற்றித்தான் பேச்சு.
வெனிஸ் நகரம், பைசா கோபுரம் போன்ற அதிசயங்கள் லியனார்டோ டாவின்சி, மைக்கல்; எஞ்சலோ போன்றோரின் ஓவியங்கள் மற்றும் பியானோ இசைக்கருவி, பீட்சா, பாஸ்தா உணவுகளின் பிறப்பிடம் என்பதால் இத்தாலிக்கு எப்போதுமே மவுசு உண்டு. அங்குள்ள லேக் கோமா உலகப் பிரசித்தம். அங்குதான் நடந்தது ‘தீப் வீர்’ திருமணம்.  அம்பானியின் மகள் இஷாவின் நிச்சயதார்த்தம் இங்குதான் நடைபெற்றதாம்.
மொத்தம் 30 பேர் மட்டுமே இந்தத் திருமணத்திற்கு அழைக்கப்பட்டிருந்தனர். பொலிவுட்டில் இருந்து ஷாருக்கான், இயக்குநர் சஞ்சய் லீலா பன்கசாலி, நடன இயக்குநர் பாராகான் ஆகியோருக்கு மட்டுமே அழைப்பு. மற்றவர்கள் பெங்களுரிலும், மும்பையிலும் நடந்த வரவேற்பு விழாவுக்குத்தான் அழைக்கப்பட்டிருந்தனர்.

பொலிவுட் வரலாற்றிலேயே ‘தீப் வீர்’ திருமண பட்ஜட் தான் மிகவும் பெரியதாம்.
மணமேடையை அலங்கரிக்க மட்டும் 12 பேர். தீபிகாவுக்கு பிடித்த லில்லி மலர்களைக் கொண்டு அலங்கரிக்கப்பட்டருந்தது மணமேடை. தீபிகாவின் தாலிக்கு மட்டும் 20 லட்சம் ரூபா செலவாம். திருமணத்தின் போது தீபிகா அணிந்திருந்த மோதிரத்தின் விலை 2 கோடி ரூபாவாக இருக்கும் என்று கூறப்படுகிறது.
இந்தியாவில் திருமணம் நடந்தால் பிரச்சினை வரலாம் என்பதால்தான் இத்தாலியில் திருமணம் நடத்தப்பட்டதாம். என்ன பிரச்சினை?
‘பத்மாவத்’ திரைப்படத்துக்கு ராஜபுதன (ராஜ்புத்) இனத்தவர்கள் கடும் எதிர்ப்பு தெரிவித்திருந்தனர். தீபிகாவின் தலையை வெட்டுவோம் என்றும் எச்சரித்திருந்தனர். இதனால் தான் இவர்களது திருமணம் இத்தாலியில் நடத்திருக்கிறது.

இலங்கையிலும் மாதம் ஒரு இலங்கைத் தமிழ்ப் படம் வரத்தொடங்கிவிட்டதே!

ராஜேஸ், கொழும்பு

2018 மலர்ந்த போது இப்படி ஒரு அதிசயம் நடக்குமென்று கனவில் கூட நினைத்திருக்கவில்லை. இலங்கை சினிமா துளிர் விடுகிறது என்று சினிமானந்தா பதில்களில் அடிக்கடி எழுதியிருந்தோம். ஆனால் அது வடக்கு பிராந்தியத்துக்கு மட்டுமே பொருத்தமாக இருந்தது.

வடக்கில் மாதம் ஒரு படம் திரையிடப்படுகிறது. அதில் லாபமோ, நாட்டமோ தெரியவில்லை. ஆனால், ஒரு திரையரங்கில் மூன்று காட்சிகளுடன் பெரும்பாலும் ஒரு படம் முடிந்து விடுகிறது. ஆனால் அந்த முயற்சிகள் பெரிதும் பாராட்டுக்குரியவை. தலைநகரான கொழும்பிலும் நாட்டின் மலையகம் மற்றும் ஏனைய பகுதிகளில் இப்படங்கள் ஏன் திரையிடப்படுவதில்லை என்று தெரியவில்லை.

இலங்கை தமிழ் படங்கள் திரையிடப்படுவதற்கென்றே ஒரு திரையரங்கை கொழும்பில் நிரந்தரமாக வைக்கவேண்டும் என்று இதே பகுதியில் எழுதியிருக்கிறோம்.

இப்போது அடுத்தடுத்த மாதங்களில் கோமாளி கிங்ஸ் இதுகாலம் என்று வெளிவந்து மகிழ்ச்சி ஏற்படுத்தியுள்ளது.

இருட்டு மறைந்து பொழுது விடிந்துவிட்ட நிலையை இது ஏற்படுத்தியுள்ளது. ஆனால் ஒன்று தெரியுமா?

குறிப்பிட்ட ‘கோமாளி கிங்ஸ்’ , ‘இது காலம்’ ஆகிய இரு படங்களும் மூன்று வருடங்களுக்கு முன் ஆரம்பிக்கப்பட்டவை. அப்போது இருந்த TREND வேறு. இப்போது நூற்றுக்கு மேற்பட்ட இளைஞர்கள் திரைக்கதைகளை தட்டச்சு செய்து அழகாக பைண்ட் செய்து வைத்துக் கொண்டு தயாரிப்பாளர்களைத் தேடியலைகின்றனர். இவர்களில் அநேகமானோர் திறமைசாலிகள்.

தென்னிந்திய தமிழ்ச் சினிமாவில் இப்போது மறுமலர்ச்சியை ஏற்படுத்திவரும் இளைய தலைமுறை இயக்குனர்களுடன் போட்டி போடக்கூடியவர்கள். ஆனால் தயாரிப்பாளர்கள் அவர்களுக்கு கை  கொடுப்பார்களா? அவர்களது திறமைகளை அங்கீகரிப்பார்களா என்பது தான் இப்போது கேள்வியாக உள்ளது.

தென்னிந்திய தமிழ்ப்படங்களே இங்கு மூன்றாவது வாரத்தை எட்டுவதற்கு சிரமப்படும் நிலையில் ‘கோமாளி கிங்ஸ்’ ஒரு மாதத்தை கடத்திருக்கும் இந்த நேரத்தில், இலங்கையில் அதிக வசூலை பெற்ற இலங்கை தமிழ்ப்படம் என்ற பெருமையை பெற்றுள்ள நிலையில் தயாரிப்பாளர்கள் கொஞ்சம் யோசிக்கலாமே!

தென்னிந்திய தமிழ்சினிமா இப்போது பிரச்சினையில் சிக்கித் தவிக்கிறது. இனிமேல் அங்கு சிறிய படங்கள் ஒடுவது பெருஞ் சிரமம். சில புதிய இயக்குனர்கள் திரையரங்குகளை நம்பாமல் NETFIXக்கு மாறியுள்ளனர். அபோபோல் இலங்கையின் எதிர்கால தமிழ்பட இயக்குனர்கள் தென்னிந்திய சினிமா பாணியை பின்பற்றாமல் வேறு வழிகளில் சிந்திப்பார்களேயானால் வெற்றி பெறலாம்.
இதேநேரம் இப்போதைக்கு இல்லையென்றால் இலங்கை தமிழ்சினிமா எதிர்காலத்தில் பிரச்சினைகளை எதிர்நோக்கக் கூடும்.

திரைப்படங்களின் வெளியீடு விநியோகம்  மற்றும் தயாரிப்பாளர்களை ஊக்குவித்தல் ஆகியவையே முக்கியமாகும். இதர பிரச்சினைகள் இருந்தாலும் இந்த முக்கிய பிரச்சினைகளை சுமூகமாக தீர்ப்பதற்கும் சரியான முடிவுகளை எடுப்பதற்கும் குழுவொன்றை அமைத்து இயங்குவது நல்லது.

இலங்கை தமிழ் படத்துறையில் முன்னர் கலைஞர்களிடையே இருந்த பொறாமை காலை வாரி விடுவதல் என்பன பெருமளவு பாதிப்புகள் ஏற்பட்டது. இனிமேல் அவ்வாறு ஏற்படாமல் இருப்பதை இப்போதே உறுதி செய்து கொண்டால்தான் எதிர்காலம் சிறக்கும். 

கண் சிமிட்டி நடிகை பிரியா வாரியர் ஹிந்திக்கு போய் விட்டாரா?

ஜான்ஸிராணி, வவுனியா

அவர் தயார்தான். ஆனால் அதில் ஒரு சிக்கல், மலையாளத்தில் உருவாகும் ஒரு அடார் லவ் என்ற படத்தில் கண்சிமிட்டியும் விரல்களால் துப்பாக்கி சூடு நடத்தியும் ஒரே நாளில் உலகம் முழுவதும் பிரபலமானவர் பிரியா வாரியர்.

அவரை தெலுங்கு படத்தில் நடிக்க கேட்டுள்ளனர். அதேவேளை  ஹிந்தியில் தீபிகா படுகோனின் காதலர் ரன்வீர் சிங்சின் ஜோடியாக ‘சிம்பா’ படத்தில் நடிக்க இரண்டு கோடி ரூபா சம்பளத்துடன் அவரை கேட்டுள்ளனர். அவரும் சம்மதம் சொல்லி விட்டார். ஆனால் ‘ஒரு அடார் லவ்’ வெளியிடப்படும் வரை வேறு படங்களில் நடிப்பதில்லை என்று ஒப்பந்தம் போடப்பட்டுள்ளதால் தவிப்பில் இருக்கிறார் பிரியா.

ஒரு அடார் லவ்’ வெளியிடப்பட்டால் தான் அவருக்கு விடுதலை!

இந்திய சினிமாவில் என்ன புதுசு?
ஜானகி , பதுளை

ஹொலிவூட்டின் புகழ்பெற்ற டைரக்டர் கிறிஸ்தோபர் நோலன் சமீபத்தில் இந்தியா வந்ததுதான் இப்போதைய பேசுபொருள். இன்செப்சன், மெமன்டோ,டன்கர்க் ஆகிய படங்களை இயக்கி பெயர் பெற்ற இவர் ‘டிஜிட்டல் மயத்தில் சினிமாவின் எதிர்காலம்’ என்ற கருத்தரங்கில் பங்குபற்ற மும்பாய் வந்திருக்கிறார்.

அமிதாப் பச்சன், கமல்ஹாசன், அமீர்கான்,ஷாருக்கான், இயக்குனர்கள், மணிரத்தம், அனுராக் சாஷியப் ஆகியோரும் இந்த கருத்தரங்கில் பங்குபற்றுகின்றனர்.

விஜய் சேதுபதி படம் தயாரிக்கிறாரா?

மைக்கல் ஜெயராஜ், பதுளை

ஆம். முன்னர் 2015 இல் ஆரஞ்சு மிட்டாய்,2017 இல் மேற்கு தொடர்ச்சி மலை. சங்குதேவன் ஆகிய படங்களுடன் இப்போது ஜீங்கா என்ற படத்தையும் தயாரித்துள்ளார். இதில் ஆரஞ்சு மிட்டாய் மட்டும் திரைக்கு வந்தது. தோல்வியடைந்தது. ஜீங்கா இப்போது வெளிநாடுகளில் படமாக்கப்படுகிறது. ஜீங்காவில் வித்தியாசமான கேச அமைப்புடன் கையில் துப்பாக்கி வைத்துக்கொண்டுள்ள விஜய் சேதுபதியையே இங்கே காண்கிறீர்கள்.

மகேஷ் பாபுவின் நேரடி தமிழ்ப்படமான ‘ஸ்பைடர்’ படுதோல்வியாமே?
எம்.இஸ்மாயில் பேருவளை

சமீபகாலத்தில் வந்த படங்களிலேயே முன்றாவது பெரும் தோல்வியை சந்தித்த படம் ‘ஸ்பைடர்’ தான்! மிகப்பெரிய தோல்விகள் பட்டியலில் ஹிரித்திக் ரோஷன் நடித்த ‘மொஹன்ஜதாரோ’ முதல் இடத்திலும் ரன்பீர் கபூர் நடித்த ‘பொம்பே வெல்வட் இரண்டாவது இடத்திலும், மூன்றாவது இடத்தில் தென்னிந்திய படமான ஸ்பைடரும் உள்ளன. ஸ்பைடரின் படுதோல்விக்கான காரணம் என்னவென்று சரியாகத் தெரியவில்லை.


‘பாகுபலி, பாகுபலி 2’ சாதனை படைத்தன. அடுத்து ‘பாகுபலி 3’ வருமா?
மங்கள, கண்டி

பாகுபலி 3 வராது. தனது அடுத்த படம் மகாபாரதம் என்று ராஜமௌலி அண்மையில் கூறியிருக்கிறார். அதற்கான திரைக்கதையை அவர் இப்போது எழுதி வருகிறார். அதனை மூன்று பாகங்களாக அவர் எடுக்கப்போகிறார். 400 கோடி ரூபா செலவில் உருவாகும் அந்தப்படத்தை எடுத்து முடிக்க 5 முதல் 6 வருடங்கள் வரை செல்லும் என்று கருதுகிறார். இப்படத்தில் நடிக்க பொலிவுட் நட்சத்திரங்களான அமீர் கான், ஷாருக்கான் ஆகியோர் விருப்பம் தெரிவித்துள்ளனர். அமீர்கான் கிருஷ்ணனாக நடிக்க ஆர்வம் காட்டுகிறார். ஷாருக்கான் கர்ணனாக நடிக்கக்கூடும்.

என்னிடம் ஒரு கதை இருக்கிறது. அதை திரைப்படமாக எடுக்க தயாரிப்பாளர் கிடைப்பாரா?
எஸ்.நவீனன்,வெள்ளவத்தை

உங்களைப் போல் கதை எழுதிவைத்துக்கொண்டு ஆயிரக்கணக்கானோர் தயாரிப்பாளரை தேடியலைந்து கொண்டிருக்கிறனர். கிடைத்தால்தானே!
அப்படியொரு தயாரிப்பாளர் கிடைத்தாலும் அவர் உங்களை சந்திக்க நேரம் ஒதுக்கவேண்டும். அவர் ஒதுக்கும் அந்த ஒரு சில நிமிடங்களில் நீங்கள் அவரை வசியப்படுத்த வேண்டும். அதாவது அவரை திருப்திப்படுத்த வேண்டும். இதற்கு உங்கள் கதையை நீங்கள் முதலில் ஒருவரியில் சொல்ல வேண்டும். இதனை TEGLINE என்று சொல்வார்கள். அதன்பின் கதைச்சுருக்கம். இதனை SYNOPSIN என்று சொல்வார்கள். அதனையடுத்து கதை முன்னோட்டம் இதில் கதை காட்சிகளாக எப்படி இருக்கும் என்பது இடம் பெறும். இதனை TREATMENT என்று சொல்வார்கள். அதற்கடுத்தது முழுமையான திரைக்கதை அதனை SCREEN PLAY என்று சொல்வார்கள். உங்கள் திரைக்கதையை சுவாரஸ்யமான கதையாக குறைந்த பட்சம் அரைமணிநேரம் தயாரிப்பாளருக்கு கதையாகச் சொல்லவேண்டும். இதற்கு சினிமாவை பற்றி தெரிந்த ஒரு இயக்குநர் உங்களிடம் இருக்கவேண்டும். தயாரிப்பாளரை தேடுமுன் அவ்வாறான ஒரு இயக்குனரை தேடியாக வேண்டும். அவரை முதலில் தேடுங்கள். அவர் மூலமாகத்தான் தயாரிப்பாளரைத் தேடவேண்டும். அழகாக கதைசொல்லி தயாரிப்பாளர் திருப்திப்படுத்திய பின்னர்தான் அவர் சரி படம் செய்யலாம் என்ற PASSWORD வெளிவரும். அடுத்து அவர் படத்தின் செலவை கேட்பார். அவர் எதிர்பார்க்கும் அளவில் அது இருந்தால்தான் மேலே செல்லலாம். அதன்பின் தயாரிப்பாளரின் ஏனைய நிபந்தனைகளை அவர் சொல்லுவார். அதற்கு நீங்கள் இணக்கம் தெரிவித்தால்தான் கதவு திறக்கும். இல்லை அத்துடன் மூடிக்கொள்ளும்.

இப்படி கதை சொல்லி தயாரிப்பாளரை கவர்ந்த இளம் இயக்குனர்கள் குறும்படம் செய்து அதனை தயாரிப்பாளரிடம் காட்டி அவரை திருப்திப்படுத்தியதும் உண்டு. முழுநீளப்படத்தையே குறும்படமாக செய்துகாட்டி தயாரிப்பாளரை திருப்திப்படுத்தியவர்களும் உண்டு. ஆனால் இந்த விடயத்தில் இப்போது புதிய டிரெண்ட் என்ன தெரியுமா? PILOTFILM இதனை முன்னோட்ட படம் என்று சொல்லாம்.
இயக்குனர் வாய்ப்பு தேடுபவர்கள், அல்லது தயாரிப்பாளர்களை தேடுபவர்கள் தாங்கள் படமாக்க நினைத்திருக்கும் கதையை தமது நண்பர்களையும், தோழிகளையும் நடிக்க வைத்து சில லட்சங்கள் செலவு நாம் கூறியவாறு முன்னோட்ட படம் தயாரிக்கிறார்கள். படத்தின் முக்கிய காட்சிகளை படத்தில் இடம்பெறுவது போலவே காட்சியமைத்து பின்னணி இசையுடன் சுமார் 20,25 நிமிடங்கள் வரை ஓடும் படமாக எடுக்கிறார்கள். முழுமையான ஒரு படத்தின் 1/6 பகுதியாக அந்தப்படம் அமைகிறது. இப்படித்தான் படம் இருக்கும். இயக்குனர் ஒளிப்பதிவாளர் திறமை ஆகியவை இதில் பளிச்சென்று தெரிந்துவிடும். அதனையடுத்து இந்த முன்னோட்ட படத்தை இணையத்தில் யுடியூப்பில் பதிவேற்றி விடுகிறார்கள். இந்த முன்னோட்ட படத்தை பார்த்துவிட்டு அதனை முழுநீளபடமாக எடுக்க விரும்புபவர்கள் குறிப்பிட்ட இயக்குனருடன் தொடர்பு கொள்ளலாம். அவள் (10 நிமிடங்கள்), தோட்டாக்கள் பூவாச்சு (13 நிமிடங்கள்), பிரதி (26 நிமிடங்கள்) லேகா (26 நிமிடங்கள்) ஆகிய முன்னோட்ட (PILOT) படங்கள் இப்போது இணையத்தில் கிடைக்கின்றன. இளம் இயக்குனர்கள் இப்போது தயாரிப்பாளர்களை தேடிப்போவதில்லை. அவர்களுக்கு கதை சொல்லுவதில்லை. மாறாக தயாரிப்பாளர்களை அவர்களை நோக்கி வரச்செய்கிறார்கள் சினிமாத்துறை எப்படியெல்லாம் மாறிவிட்டது பார்த்தீர்களா?